Qazaqstannyń jastar quramasynyń qorǵaýshysy Dinmuhamed Qashken Fransııa chempıonatynda óner kórsetip júrgen «Lıon» klýbynyń jeıdesin kııýi múmkin.
1950 jyly irgetasy qalanǵan «Lıon» Fransııadaǵy eń myqty klýbtardyń biri. Olar el birinshiliginde 7 ret chempıondyq ataqqa qol jetkizse, 5 ret kúmis medaldi ıelendi. Taǵy 8 ret qolaǵa qol sozdy. Fransııa kýbogyn úsh márte oljalady. 2010 jyly Chempıondar lıgasy, 2017 jyly Eýropa lıgasy jáne 1964 jyly Kýbok ıegeleri kýbogynyń jartylaı fınalynda kúsh synasty. 1997 jyly Intertoto kýbogyn enshiledi.
Qazirgi kezde «Lıon» jarys kestesinde PSJ men Lıllden keıingi úshinshi orynda keledi. 31 oıynda olar 56 upaı jıdy. Kósh basyndaǵy PSJ-dan lıondyqtardyń 15 upaıy jáne ekinshi satydaǵy Lıllden 5 upaıy kem.
19 jastaǵy Dinmuhamed Qashken birer jyl Madrıdtiń «Atletıko» akademııasynda jattyqty. 2016 jyly «Astananyń» qosalqy quramy jáne 2018 jyly «Jetisý-B» klýby sapynda óner kórsetti. Byltyrǵy jyldyń jeltoqsan aıynda Ispanııanyń jastar lıgasyndaǵy «Kasablankanyń» jeıdesin kıdi. Sondaı-aq, Qashken Qazaqstannyń jasóspirimder quramalarynyń (U-17, U-19) kapıtany bolyp, keıinnen elimizdiń jastar komandasyna qabyldandy.