- Azııa chempıonatynyń bastalýyna sanaýly kún qaldy. Ziltemirshilerdiń daıyndyq kezeńi qalaı ótýde?
- Komanda músheleri Azııa chempıonatyna daıyndyq barysynda Reseıdiń Sochı qalasynda bir boıy oqý-jattyǵý jıynyn ótkizdi. Arasynda Reseıdiń bas komandasymen birlesip daıyndaldyq. Bul jattyǵý kezeńiniń bizge bergen paıdasy kóp. Endi elge oralyp, Shymkenttegi «BIIK» sporttyq bazasynda jattyǵýdamyz. Aýyr atletıkada kóp nárse ózgeriske ushyrady. Ásirese, Olımpıada oıyndaryna irikteý saıystarynyń sany kóbeıip, olımpıadalyq salmaq dárejeleri jasaqtaldy. Tokıo oıyndaryna upaı beretin jarystar qatarynda 2020 jyly Nur-Sultanda ótetin Azııa chempıonaty men qyrkúıek aıynda Taılandta ótetin álem birinshiligi de bar. Dál qazir bizdiń aldymyzda meıilinshe kóbirek upaı jınaý mindeti tur.
- Qytaı tórinde synǵa túsetin sportshylar quramy tolyq anyqtaldy ma?
- Iá, komandany túgeldeı jasaqtadyq. Azııa birinshiligine qatysatyn sportshylar arasynda Olımpıada chempıony Rahım Nıjatov, Olımpıada júldegeri Denıs Ýlanov pen Jazıra Japarqul bar. Sondaı-aq, Ilıa Ilın men Zúlfııa Chınshanlo da qatarǵa qosyldy.
Eger tolyqtyryp aıtar bolsam, erler arasynda tómendegi sportshylarǵa senim artamyz:
Arleı Chonteı (55 keli), Farhad Harkı (67 keli), Denıs Ýlanov, Nurjan Sámenov (81 keli), Nıjat Rahımov (89 keli), Ilıa Ilın, Rýstam Sybaı (96 keli), Aleksandr Zaıchıkov, Ibragım Bersanov, Selimhan Abýbakırov (109 keli).
Qyzdar arasynda synǵa túsetin sportshylar:
Zúlfııa Chınshanlo (55 keli), Karına Gorıcheva (64 keli), Ekaterına Stolıarenko, Ekaterına Bykova (71 keli), Jazıra Japarqul (76 keli), Raýshan Meshithanova (81 keli), Larısa Kobeleva (87 keli), Aızada Múftilda (+87 keli).
- Ilıa Ilınniń salmaq aýystyrǵanyn baıqap otyrmyz. Odan bólek, Jazıra Japarqul da qatarǵa qosylypty...
- Iá, Ilın 96 kelige qaıta oraldy. О́ıtkeni, basqa tańdaý joq. Olımpıadalyq salmaq dárejesine 96 jáne 109 keli enedi. Ilın 96 kelide baq synaýdy jón kórdi. Al Jazıra Japarqul Rıo Olımpıadasynan keıin eshqandaı jarysqa qatysqan joq. Jaqynda ǵana quramaǵa oralyp, Sochıdegi jattyǵý jıynyna qatysty. Ázirge, Jazıraǵa qatysty eshteńe aıta almaımyn. Onyń qurlyq dodasynda júldege talaspaıtyny anyq. Biraq osy týrnırden qalyp qoısa, kelesi Olımpıadaǵa joldama alý týraly umytýǵa bolady. Sol sebepti, oǵan Azııa chempıonatyna mindetti túrde qatysyp, upaı jınaý kerek. Bul Ilınge de qatysty. Eger Tokıo oıyndaryna qatysatyn bolsa, Azııa chempıonatynda mindetti túrde synǵa túsýi tıis.
- Demek, sportshylardyń aldynda medaldan góri, upaı alý mindeti tur. Solaı ma?
- Ázirge solaı aıtqym keledi. Komanda turaqty nátıje kórsetip, qandaı da bir jaraqattyń kesiri tımese deımiz. Onyń ústine, qurlyq synyna qatysatyn birneshe sportshymyzdyń azdaǵan jaraqaty bar. Aldymyzdaǵy basty maqsat – reıtıngilik upaı jınaý. Bári de sportshynyń óz qolynda. Qazir Olımpıadaǵa irikteý júıesi ózgerdi. Buryn eki álem chempıonatynyń qorytyndysy boıynsha lısenzııa beriletin. Endi tórtjyldyq oıyndaryna joldama alý úshin alty birdeı týrnırde upaı jınaý qajet. Sondaı-aq, endi Olımpıada oıyndaryna lısenzııany kim utyp alsa, sol ǵana qatysady. Bapkerlerdiń ornyna basqa sportshyny jiberýge quqyǵy joq.