Konferensııa jumysyna Eýrazııa jáne Uly Jibek joly elderiniń Bas múftıleri, din qaıratkerleri, dinı saladaǵy memlekettik organdardyń basshylary, laýazymdy tulǵalar, zııaly qaýym ókilderi, jalpy 300-ge jýyq delegat qatysty.
Konferensııa qatysýshylaryn Aqparat jáne qoǵamdyq damý mınıstri Dáýren Abaev qarsy aldy.
«Jastardyń rýhanı-ónegelik, zııatkerlik damýy, sondaı-aq onyń áleýmettik qoldaý máseleleri bizdiń memleketimizdiń basty basymdyqtary bolyp tabylady. Bıylǵy jyly Qazaqstannyń Tuńǵysh Prezıdenti – Elbasy Nursultan Nazarbaevtyń «2019 – Jastar jyly» dep jarııalaǵan ıgi bastamasynyń aıasynda atqarýshy bılik jańa múmkindikterdi qurý máselelerine baıypty nazar aýdardy. Soǵan oraı, Úkimet jergilikti atqarýshy organdarmen birlese otyryp, birqatar mańyzdy sharalar qoldanýda. Bul sharalar jastardyń áleýetin damytý, olardy jumyspen qamtý, otbasylyq qundylyqtardy dáripteý, bos ýaqytty uıymdastyrý jáne jastardyń bastamalaryn qoldaý, kásipkerlik jáne erikti qyzmetti qoldaý úshin jaǵdaılar jasaýǵa baǵyttalǵan», - dep Aqparat jáne qoǵamdyq damý mınıstri Dáýren Abaev sóz bastady.
Mınıstrdiń aıtýy boıynsha, bul baǵytta ásirese dinder ınstıtýty jastarǵa úlken áser etedi.
«Elordamyzda Elbasynyń bastamasymen Álemdik jáne dástúrli dinder kóshbasshylary seziniń ótkizilip turýy da osynyń aıǵaǵy bolsa kerek. Qazaqstan Uly dalanyń rýhanı muralary dástúrimizben sabaqtasyp ketken Islam qaǵıdalaryn qurmetteıdi. Alaıda zaıyrly, kópultty memleketterge tán, ózge nanym-senim ókilderiniń de tańdaýyna shekteý qoımaıdy. Kópkonfessııaly ártúrli ult ókilderi tatý-tátti ǵumyr keship otyrǵan qoǵamda birlik pen beıbitshilikti saqtaý birinshi kezektegi másele. Sondyqtan da bul qaǵıdadan taımaımyz» - dedi vedomstva basshysy.
Sonymen qatar, plenarlyq otyrys barysynda Reseı Múftıleri Keńesi men Reseı Federasııasynyń musylmandary dinı basqarmasynyń Tóraǵasy, Joǵarǵy múftı jáne Qazaqstan musylmandary dinı basqarmasynyń Tóraǵasy, О́zbekstan musylmandary dinı basqarmasynyń Tóraǵasy, Qytaı Islam assosıasııasynyń Tóraǵasy, Mońǵolııa múftıi jáne Fınlıandııa Islam ortalyǵynyń Tóraǵasy sóz sóıledi.
Búgingi tańda «Rýhanı jibek joly» jobasynyń qatysýshylarynyń birlesip kúsh salysýynyń arqasynda Qazaqstan, Reseı jáne Ortalyq Azııa memleketteriniń musylmandary dinı basqarmalary men Qytaıdaǵy mıllıondaǵan musylman qaýymdastyǵynyń arasynda turaqty baılanys arnalary quryldy. «Rýhanı Jibek joly» halyqaralyq jobasy jahandaný dáýiriniń máselelerin sheshýge dáıekti, jemisti tásilderdi damytý úshin senimdi negiz boldy.