Atyraý oblystyq qoǵamdyq densaýlyq saqtaý departamenti mamandarynyń qorytyndysy boıynsha, qyzylsha aýrýymen tirkelgender sany azaıyp keledi. Jyl basynan beri Jylyoı aýdanyndaǵy Teńiz ken ornynda qyzylsha aýrýynyń 4 deregi tirkeldi.
- Alǵashqy oqıǵa qańtar aıynda anyqtaldy, naýryzda qyzylshamen 3 adam aýyrdy. Aýyrǵandardyń ekeýi qarym-qatynas arqyly juqtyrǵan, jastary 45-ten joǵary, vaksınaǵa alýǵa jatpaıdy. Basqa qarym-qatynastaǵy adamdar vaksınasııa aldy. Aýrýdyń taraýy tirkelgen joq, jaǵdaı baqylaýda,-dedi Atyraý oblystyq qoǵamdyq densaýlyq saqtaý departamenti.
Aıta ketsek, jyl basynan beri aımaqta qyzylshaǵa qarsy josparly vaksınasııamen 9 myń adam qamtylǵan. Sáýir aıynan bastap qaýip-qater tobyndaǵy 9-10 aılyq náresteler, 40 jasqa deıingi medısınalyq qyzmetkerler men qyzylsha oshaǵyndaǵy 30 jasqa deıingi adamdar ekpe aldy.
-11 sáýirdegi málimet boıynsha qosymsha 1062 adamǵa ekpe salyndy. Qyzylshaǵa qarsy ımmýndaý jumystary jalǵasýda, aldyn alý, epıdemııaǵa qarsy sharalardy úılestirý shtaby quryldy, turǵyndarmen túsinik jumystary jalǵasyn taýyp jatyr,-dep naqtylady Departamentte.
Qazir Atyraý oblysynda qyzylshaǵa qarsy vaksına jetkilikti. Bıyl 16000 doza vaksına alyndy, taǵy qosymsha 15450 alynady, sonymen qatar, qaýip-qater tobyndaǵylarǵa salýǵa 20500 doza vaksınaǵa tapsyrys berildi. Ekpe salý jumystary arnaıy kabınette ótýde. Medısınalyq qyzmetkerler vaksınasııa ótkizý boıynsha daıyndyqtan jáne attestasııadan ótken.