Ortalyqta múgedek jandar men olardyń otbasy músheleri birge bola alady. Oblys ákimi Ortalyqtyń turaqty basshysy ári «Qazaqstannyń eńbek eri» Quralaı Baımenovamen jáne ondaǵy qyzmetkerlermen tildesip, memlekettik áleýmettik tapsyrystar aıasyndaǵy materıaldyq-tehnıkalyq bazasymen, kórsetiletin qyzmettermen tanysty.
Qazirgi ýaqytta «Aqtóbe qalalyq sal aýrýyna shaldyqqan azamattardy qoldaý ortalyǵy» janynda qoǵamdyq qabyldaý, áleýmettik qyzmet bólimi, múgedekterdiń belsendi ońalýyna arnalǵan kabınet, eriktiler klýby jáne múgedek arbalaryn jóndeý qyzmeti, tigin sehy jumys jasaıdy. «Inva-taksı» qyzmeti 2005 jyldan beri júzege asqan. Avtoparkte 8 avtokólik bolsa, onyń 3-ýi mamandandyrylǵan kótergishtermen jabdyqtalǵan. «Inva-taksı» kúnine 40-60 azamatqa qyzmet kórsetedi.
Oblys ákimimen áńgimelesý barysynda Quralaı Baımenova keń ǵımarat nemese bólme qajettigi jaıly ótinishin jetkizdi.
Ońdasyn Orazalın ýákiletti memlekettik organdarǵa osy máseleni zerdeleýdi tapsyrdy.
«Ǵımarat tarlyq etse, usynysyńyz oryndy, ony keńeıtý qajet»,- dedi oblys basshysy.
Aımaq basshysynyń bul sapary Quralaı Baımenovanyń týǵan kúnimen tuspa-tus kelgendikten, oblys ákimi qoǵam belsendisin quttyqtap, oǵan densaýlyq, jumysta sáttilik tiledi. Sondaı-aq, estelik syılyqtaryn tabystady.