20 sáýir kúni tańǵy saǵat 04:15-te Almaty-Tashkent avtojolynyń 181 shaqyrymynda Toyota Camri jeńil avtokóligi (memlekettik nómiri 811 IJA 02) osy baǵytta júrip bara jatqan Mersedes-Bens 814 (memlekettik nómiri 209 HOA 08) júk kóliginiń artyna soǵylǵan. Apat saldarynan jeńil kólikte otyrǵan áıel oqıǵa ornynda kóz jumdy. Sol sátte Shymkent qalasynan Almaty qalasyna baǵyt alǵan Van Hool (memlekettik nómeri 8213 FA 13) avtobýsy apatqa ushyraǵan kólikti aınalyp ótpek bolyp, aýdarylyp, 8 jolaýshy oqıǵa ornynda qaza boldy. Kólik ishinde bolǵan 46 azamattyń 44-i О́zbekstan azamattary bolsa, qalǵan 2 jolaýshy qazaqstandyq azamattary bolyp shyqty.
Jambyl oblysy ákimi baspasóz qyzmetiniń habarlaýynsha, oqıǵa ornyna jedel túrde Qordaı aýdanynyń ákimi Bolatbek Baıtóle jáne jedel járdem, tótenshe jaǵdaı qyzmetteri jetip, zardap shekkenderdi Otar stansııasyndaǵy jáne Qordaı aýdanyndaǵy aýrýhanalarǵa jetkizdi. Apatqa ushyraǵandardyń 2-eýi aýrýhanaǵa jetpeı kóz jumǵany belgili boldy. Sonymen, apat saldarynan 11 adam qaza tapty. Sondaı-aq, 5 adam ota ústelinde, al 3 adam jan saqtaý bóliminde jatyr. Jaraqat alǵan basqa jolaýshylarǵa tıisti kómek kórsetilýde. Zardap shekkenderge jedel kómek kórsetýge Jambyl oblystyq densaýlyq basqarmasynyń basshysy Marat Jumanqulov bastaǵan 3 otashy-dáriger tikushaqpen Qordaı aýdanyna jetkizildi.
Oryn alǵan oqıǵaǵa qatysty búgin Taraz qalasynda arnaıy komıssııa quryldy. Komıssııa quramynda Jambyl oblysy ákiminiń birinshi orynbasary Bekbolat Orynbekov, oblystyq polısııa departamentiniń bastyǵy, polkovnık Arman Orazalıev jáne basqa da tıisti laýazym ıeleri bar. Komıssııa oqıǵa ornyna baryp, jol-kólik oqıǵasynyń mán-jaıyn anyqtap, zardap shekkenderge sapaly kómek kórsetýdi uıymdastyrýda. Sonymen birge oqıǵa ornynda Jambyl oblysynyń prokýrory Jarqyn Qusaıynov jumys jasaýda. Al, apatqa qatysty Qazaqstan Respýblıkasy Qylmystyq kodeksiniń 345 babynyń 4 tarmaǵyna saı qylmystyq is qozǵaldy.
Jambyl oblysy