О́ńir basshysy Ońdasyn Orazalın jetim jáne ata-ana qamqorlyǵynsyz qalǵan balalardy qoldaý úshin uıymdastyrylǵan qaıyrymdylyq sharaǵa qatysty. Bul týraly oblys ákimdiginiń baspasóz qyzmeti habarlady.
Jıynda jastarǵa demeýshiler tarapynan 30-100 myń teńge kóleminde «Turǵyn úı qurylys jınaq banki» AQ shottaryna túsetin qarjylaı sertıfıkattar tabys etildi.
Qarajat oblystyq máslıhat depýtattary, memlekettik mekeme basshylarynyń kúshimen jetim balalardy uıymdar men mekemelerdiń patronattyǵyna bekitý aksııasy aıasynda jınaldy.
Sondaı-aq, Ońdasyn Orazalın taǵdyry aýyr 6 balaǵa bir bólmeli páter kiltin tabystady. Jańa qonysqa ıe bolǵan balalar qýanyshty sátti paıdalanyp aımaq basshysyna óz alǵystaryn bildirdi.
«Ata-ana qamqorlyǵynsyz qalǵan balalarǵa qamqorlyq kórsetý azamattyq paryzymyz. Olardyń bolashaǵy jarqyn bolýy úshin qoǵamnyń qamqorlyǵy qajet»,- dedi aımaq basshysy.