XVI Eýrazııa medıa forýmy «Búgingi álem: shyndyq transformasııasy?» ataýymen ótedi. Konferensııada álemdik jáne óńirlik deńgeıdegi birqatar ózekti máseleler kóterilmek. Kún tártibinde: jahandanýǵa qarsy prosester, tutyný daǵdarysynyń tereńdeýi, halyqaralyq quqyq jáne jasandy aqyl-oıdy paıdalanýmen baılanysty syn-qater talqylanady. Sondaı-aq, Forým aıasynda medıa saladaǵy kásibı taqyryptar – sıfrlyq álemdegi jýrnalıstıkanyń bolashaǵy men blogsfera yqpalynyń artýyn tilge tıek etedi.
Ortalyq Azııadaǵy kóshbasshy ári táýelsiz dıalog alańy retinde Eýrazııa Medıa Forýmynyń (EAMF) basty maqsaty – saıasatkerler, jýrnalıster men sarapshylardyń Qazaqstan, Eýrazııa jáne dúnıejúzilik qaýymdastyqtyń geosaıası, ekonomıkalyq, áleýmettik-mádenı damýymen baılanysty ótkir máselelerdi talqylaýyna jaǵdaı jasaý. Forým qurylǵan ýaqyttan beri Qazaqstanǵa 6000-nan astam sheteldik ókil qatysty. Olardyń arasynda saıasatkerler, ekonomıster, saıasattanýshylar, Nobel syılyǵynyń ıegerleri, qoǵam qaıratkerleri, ǵalymdar men kásipkerler bar. Forýmda ár jyldarynda Islam respýblıkasynyń burynǵy prezıdenti Iran Muhammed Hatamı, Aýǵanstannyń 12-shi prezıdenti Hamıd Karzaı, amerıkalyq dıplomattar Rıchard Holbrýk pen Rıchard Perl, AQSh-tyń burynǵy kongresmeni, Demokrattardyń basqarý keńesiniń tóraǵasy Harold Ford, Ulybrıtanııanyń burynǵy syrtqy ister mınıstri Djek Stro, Grekııanyń burynǵy týrızm mınıstri jáne parlament múshesi Olga Kefaloıannı, brıtan fýtýrology Reı Hammond, tanymal jýrnalıster Vladımır Pozner, Maksım Shevchenko, Mıhaıl Leontev, Sofıko Shevardnadze, Pıter Lavel, Pola Slıer, Stıven Koýl, Nık Goýıng, Ksenııa Sobchak, ITAR-TASS aqparat agenttiginiń jetekshileri Vıtalıı Ignatenko men Mıhaıl Gýsman, jazýshy Shyńǵys Aıtmatov, NATO birikken kúshteriniń burynǵy joǵarǵy bas qolbasshysy Ýeslı Klark, RF úkimetiniń burynǵy tóraǵasy Evgenıı Prımakov, UQShU bas hatshysy Nıkolaı Bordıýja, AQSh prezıdentiniń ulttyq qaýipsizdik jónindegi burynǵy keńesshisi Zbıgnev Bzejınskıı, EQYU-nyń BAQ bostandyǵy jónindegi ókili Arlem Dezır, VICE News Tonight sheteldik bólimshesiniń NVO kabeldik jáne spýtnıktik telejelisi jańalyqtar shyǵarylymynyń basshysy Norın Jamıl, amerıkalyq saıası tehnolog, Barak Obamanyń qos birdeı prezıdenttik saılaý naýqanynda negizgi keńesishisi bolǵan Rodjer Fısk, VVS telearnasynyń jańalyqtar redaktory, «Emmı» syılyǵynyń ıegeri Gevın Hıýıtt, prodıýser, rejısser, «Oskar» syılyǵynyń nomınanty Evgenıı Afıneevskıı syndy spıkerler boldy.
Is-sharanyń keń aýqymy men halyqaralyq deńgeıi elimizdiń jahandyq aqparat keńistigine enýine baǵyttalǵan mindettiń ajyramas bóligi bolyp tabylady. Forýmnyń tıimdi atqarǵan jumysynyń arqasynda elimiz bedeldi sarapshylar, álemdik BAQ, qoǵamdyq pikir kóshbasshylary deńgeıinde halyqaralyq qaýymdastyqta tanyldy. Sonymen qatar, jalpy, forýmdy ótkizý ıdeıasy jetekshi halyqaralyq medıa salasynda edáýir qoldaý tapty. Aıtalyq, EAMF jumysyna Euronews, CNN, BBC, Associated Press Television News, Reuters, Bloomberg, New York Times, Al Jazeera English, ITAR-TASS, «Novostı» RAA, RBK, Russia Today, Birinshi arna, «Jıhan» aqparat agenttiktrin qosqanda, álemdegi 1500-den astam bedeldi BAQ ókilderi atsalysýda. XVI Eýrazııa Medıa Forýmynyń bas seriktes – «Samuryq-Qazyna» aksıonerlik qoǵamy.