Qazaqstandyq bloger ári kásipker Sáýle Bazarhannyń qaıtys bolǵany týraly aqparat tarady. Qaraly habardy prodıýser Gúlzıra Aıdarbekova áleýmettik jelidegi paraqshasynda rastady. Ol marqumnyń ózine «sińlisindeı jaqyn adam» bolǵanyn aıtyp, kóńil aıtty. Alaıda ólimniń naqty sebebi týraly málimet bergen joq, dep habarlaıdy Egemen.kz.
Halyqstan arnasynyń málimetinshe, bloger Almatydaǵy plastıkalyq hırýrgııa klınıkalarynyń birinde kóz jumǵan bolýy múmkin. Aldyn ala aqparat boıynsha, áıeldiń jaǵdaıy operasııa bastalmaı turyp nasharlaǵan. Oqıǵadan keıin klınıka ýaqytsha jabylǵany da aıtyldy. Sonymen qatar 2GIS platformasynda qoldanýshylar abdomınoplastıka kezinde áıeldiń qaıtys bolǵany týraly pikirler qaldyrǵan. Biraq bul aqparat ázirge resmı túrde rastalmady.
Keıinirek Threads jelisinde marqumnyń qyzy jazba jarııalady. Onyń aıtýynsha, 53 jastaǵy Sáýle Ermahanova 15 mamyr kúni Almatydaǵy jeke klınıkada lıposaksııa jasaý kezinde, jergilikti anestezııamen jasalǵan josparly operasııa barysynda qaıtys bolǵan.
Qyzynyń sózinshe, dárigerler ota eń kóbi bir jarym saǵatqa sozylady dep sendirgen. Alaıda birneshe saǵat boıy týystaryna eshqandaı aqparat berilmegen.
«Bir saǵat ótti. Eki saǵat ótti. Úsh saǵat ótti. Biraq eshkim naqty jaýap bermedi. Anamnyń ómirden ótkenin janynda júrgen týysymyzǵa tek keshki alty shamasynda aıtqan», dep jazdy ol.
Marqumnyń jaqyndary jedel járdemniń ne sebepti kesh shaqyrylǵanyn jáne áıeldi aman alyp qalý úshin qandaı áreketter jasalǵanyn anyqtaýdy talap etip otyr. Olardyń aıtýynsha, qaıǵyly jaǵdaıǵa qaramastan, klınıka jumysyn toqtatpaǵan.
«Anamyzdyń ólimine qatysty barlyq mán-jaı tolyq anyqtalǵanǵa deıin klınıkanyń qyzmeti toqtatylýy kerek. Biz ádil tergeý júrgizýdi talap etemiz», dedi qyzy.
Aıta keteıik, buǵan deıin elordadaǵy stomatologııalyq klınıkalardyń birinde em qabyldap jatqan 20 jastaǵy qala turǵyny qaıtys boldy.