«Qolda bar altynnyń qadiri joq» demekshi, osynaý jerdiń rahatyn bizdiń jerlester kórip otyr ma? Menińshe, joq. Sebebi Syr ananyń jaǵalaýyna demalys oryndary nemese balyq aýlaý, sýyna shomylý úshin arnaıy jer bólinip, kerek-jaraqty qural-saımandarmen, qorǵanys zattarmen jabdyqtalýy tıis. Balalarymyzdyń demalýy úshin bıýdjetten kórshi aýdandarǵa aqsha aýdarylady. Bul qarjy ózimizde qalsa, kóptegen kásipkerler jumyssyz júrgen qanshama adamǵa jumys taýyp berer edi.
Sózimiz dáleldi bolýy úshin osy máseleniń mánisin taıaýda «Egemen Qazaqstan» gazetinde jarııalanǵan Ǵ.Elshibaıdyń «Jaǵajaı bar, jaǵdaı da jasalady» atty maqalasynan úzindi keltireıik: «Túrkistan oblysyndaǵy Shardara aýdany jaǵajaı týrızmin damytýǵa qolaıly aımaq. Bul maqsatta orman qory jerinen eldi meken sanatyna aýystyrylǵan 255 gektar jer ýchaskesine ınjenerlik-kommýnıkasııalyq ınfraqurylymdar qurylysyna jobalyq-smetalyq qujattama ázirlep, qurylys jumystaryn 2019 jyly bastaý kózdelip otyr.
«Jaǵajaıdyń týrıstik áleýetin, jolaýshylar legin zerttep-eseptep jatqan ınvestorlar Shardaraǵa keletinder sany kóbeıse, áýejaıdy iske qosary anyq. Joba júzege asyrylǵan soń alǵashqy jyly kelýshiler sany 30 myńnan asady dep boljanyp otyr. Sondaı-aq jaǵajaıdaǵy nysandardyń jyl boıy jumys isteýi de jobada qaralǵan. Balyq aýlaý, katerlermen serýendeý sekildi qyzmetterden týrıstik baǵyttar daıyndalýda. Keń kólemde ári alǵash ret ótkizilgen «Safari Shardara» týrıstik festıvali jaǵajaıdyń múmkindigi men áleýeti mol ekenin ańǵartty», deıdi aýdan ákimi Bolatbek Qystaýov».
Endi Shardaranyń bizdiń aýmaqtaǵy jaǵalaýyna keleıik. Kóbimiz taıaýda teledıdardan «Shabdaly» atty telefılmdi kórdik qoı. Shardara teńiziniń bizdiń tustaǵy jaǵalaýynda túsirilgen osy fılmdi tamshalap otyryp, qaraıǵan taýy joq, sarqyraǵan ózeni joq, keń jaılaý kókmaısaly jaılaýy joq, bul kóp nárseden ǵarip ne degen jer degenderge óte dáleldi jaýap edi dep qatty qýanǵanym bar. Osy fılmdi túsirgen rejısserge raqmetimdi aıtyp otyrdym.
Fılmde sý jaǵalaýy ádemi kórsetilgen. Jaǵalaýda tirshilik keshýshi adamdardyń baý-baqshasy da kókoraıly ásem eken. Dál osy jerlerden balalarymyzǵa arnalǵan demalys lagerin salýǵa bolmas pa? Tipti ishki týrızmdi damytý úshin arnaıy joba jasap, Úkimetke usynyp, demalys úılerin de salýǵa, demalysty qyzyqty uıymdastyrýǵa da bolady ǵoı. Ol úshin alǵashqy qadam Shardara aýdanynyń ákimdigimen kelisip, sý jolyn ashýǵa múmkindik jasaý. Iаǵnı, Jetisaı-Shardara sý jolymen eki aýdan turǵyndary kelis-barysty ornyqtyrady. Sý joly iske asqan soń ózara saýda-sattyq, mádenı-ádebı, sporttyq, iskerlik baılanys ta ret-retimen tirshilikke enedi. Al Shardarada áýe joly qalypqa tússe, bizdiń adamdar da Shardaraǵa ushaqpen jetip, sý jolymen úıine erterek keler edi.
Qazaqstan qazir iskerler mekeni. Qanshama jobalar qolǵa alynyp jatyr. Bári halyq úshin. Sonyń biri bizdiń aýmaqtaǵy Shardara men Syr ananyń jaǵalaýynda bolashaqta ornyǵatyn demalys aımaqtary bolýy tıis.
Bul aıtylǵandar birden iske asa qoımas. Degenmen, óz jerimizdi ózimiz túletpesek, óz usynysymyzdy ózimiz joǵaryǵa ótkize almasaq, onda týǵan jerge degen qurmet ádirem qalmaı ma? Sońymyzda azamattyqqa tán bir iz qaldyrmasaq, onda osy eldiń azamatymyn dep qalaı ǵana aıta alamyz?
О́simhan PISTEBEK,
jýrnalıst
Túrkistan oblysy,
Jetisaı aýdany