Qostanaı qalasyndaǵy «Áýejaı» jańa shaǵyn turǵyn aýdanynda ornalasqan «Qostanaı» sport jáne oıyn-saýyq ortalyǵynyń at shaptyrym zaly yǵy-jyǵy jastar. Jaǵalaı aýdandar men qalalardan kelgen kásiporyndar men sharýashylyqtar, ıaǵnı jumys berýshiler, sonymen qatar «Atameken», «Damý», «Tobol» ÁKK sekildi kommersııalyq jáne qarjylyq qurylymdar, barlyǵy elýden astam qurylym ókilderi olarǵa bos oryndar usyndy. Sharanyń ashylý saltanatynda oblys ákimi Arhımed Muhambetov sóılep, jas mamandar úshin jármeńkeniń sátti ótýin tiledi.
«Jármeńke jumys berýshiler úshin bilikti mamandardy tartýǵa, al jas mamandar úshin laıyqty jumys ornyn tabýǵa múmkindik beredi. Oblysta óndiris oryndary ashylyp, jańa jumys oryndary usynylyp jatyr. Aýdandar men qalalardyń tek bıýdjettik salasynda ǵana bos 1200 jumys orny bar.
Halyqty jumyspen qamtý úshin memlekettik birneshe baǵdarlamalar bar. «Dıplommen aýylǵa!», «Serpin-2050», «Eńbek», «Bıznestiń jol kartasy-2020» jáne taǵy basqa baǵdarlamalar jas mamandarǵa barlyq qolaıly sharttardy usynady» dedi Arhımed Begejanuly.
2009 jyldan beri «Dıplommen – aýylǵa!» baǵdarlamasy boıynsha oblys qalalary men aýdandaryna 4310 jas maman bardy. Olarǵa memleket tarapynan 4,7 mıllıard teńge qoldaý kórsetildi. Bıylǵy jyly «Serpin» baǵdarlamasy arqyly oblystaǵy joǵary jáne orta oqý oryndarynan bilim alǵan 700-den astam stýdent bos oryndar jármeńkesine qatysty. О́ńir basshysy jastarǵa bıylǵy jármeńkeniń ereksheligin de atap ótti.
«Sizder «Eńbek» baǵdarlamasy men «Eńbek resýrstarynyń utqyrlyǵy» baǵyty boıynsha tamasha múmkindikke ıe bolyp otyrsyzdar. 2018 jyldan bastap Baǵdarlama qatysýshylarynyń qataryna "Máńgilik el jastary - ındýstrııaǵa!" ("Serpin") jobasynyń túlekteri de qosyldy. Endi «Serpin» jobasy boıynsha burynǵydaı tek ońtústik pen batystaǵy bes oblystan ǵana emes, elimizdiń qaı shalǵaıynan qonys aýdarsa da, olar qonys aýdarý baǵdarlamasyna qatysa alady» dedi Arhımed Begejanuly.
Aýdandar men qalalar ákimdikteri «Serpin» jobasy boıynsha jáne basqa da jas mamandarǵa barlyq qolaıly jaǵdaılardy jasaýǵa alaqanyna túkirip otyr.
«Bizge barlyq mamandar kerek. Bıyl bes dáriger keledi, medısınalyq joǵary oqýtoryndaryndaǵy túlektermen shartqa otyrdyq. Olarǵa bir rettik kómek 1,5 mıllıon teńge shamasynda tólenedi, aýylda baspana satyp alýyna jeńildikpen nesıe beriledi. Aýyl mektepterine 30 shaqty muǵalim qajet. Kelgen mamandardyń barlyǵyna osyndaı kómek kórsetiledi» deıdi Fedorov aýdanynyń ákimi Táýba Isabaev.
Kóptegen sharýashylyqtarǵa mal dárigeri, zootehnık, agronom mamandary kerek. Jármeńkede sharýashylyq basshylary túlektermen shartqa otyrdy.
Jármeńke tańerteńnen tús qaıtqansha boldy. Onyń nátıjesi, ıaǵnı qansha jastyń óz jumys ornyn tapqany aldaǵy kúnderi belgili bolady.