Brass ádisimen 200 metrge júzý saıysynda berilgen qashyqtyqty 2:09.37 ýaqytymen júzip ótken bizdiń sportshy tórtinshi nátıjeni kórsetti. A normatıviniń ýaqyty - 2:10.35. Osylaısha qazaqstandyq sportshy osy jetistiginiń arqasynda Tokıodaǵy Olımpıada oıyndaryna joldama aldy.
Osy qashyqtyqta 2016 jylǵy Olımpıada oıyndarynyń qola júldegeri reseılik Anton Chýpkov 2:07.48 ýaqytymen jeńimpaz atandy. Ekinshi orynda qytaılyq Sın Haııan. Onyń ýaqyty - 2:08.31. Japonııalyq Ippeı Vatanabe 2:09.33 kórsetkishimen úshinshi oryn aldy.
Dmıtrıı Balandın sondaı-aq 4h100 metr aralas estafetasyna qatysty. Bul saıysta ol qola medal ıelendi.
«Swim Series týrnıriniń alǵashqy kezeńinen úlken áser aldym. Shoý óte joǵary deńgeıde ekenin kórinip tur. Sportshylarǵa da, jankúıerlerge de óte qyzyqty. Osy jarys arqyly Olımpıada oıyndaryna daıyndalyp jatyrmyn. Týrnırge qatysyp jatqan álemniń úzdik sportshylarymen jarysý múmkindigi týǵanyna qýanyshtymyn. 200 metrge brass ádisimen júzý jáne estafeta saıysyna qatystym. Estafetaǵa qatysatyn komandalar jerebe arqyly jasaqtaldy. Menimen birge reseılik sportshy jáne Avstralııa men Ulybrıtanııanyń júzýshileri boldy. Jeńiske jetýge de bolýshy edi, sál ǵana qarsylastarǵa ese jiberip qoıdyq»,- dedi Balandın.
Aıta keteıik, bul týrnırge normatıvterdi oryndaý arqyly qatysý múmkindigi joq, tek úzdikter arnaıy shaqyrtýmen baǵyn synaı alady. Jarysqa olımpıada chempıondary, álem chempıonattarynyń jeńimpazdary, rekordshylar men FINA-nyń byltyrǵy reıtınginiń kóshbasshylary ǵana qatysyp jatyr.
Biregeı týrnırdiń ekinshi kezeńi 11 mamyrda Býdapesht qalasynda ótedi. Álemdik serııanyń sońǵy kezeńi 31-mamyr men 1-maýsym aralyǵynda AQSh-tyń Indıanapolıs qalasynda bolady.