Túrki álemi zertteý ınstıtýtynyń professory Metın Ekındjı túrki álemine qundy jazbany Qazaqstannan tapqanyn aıtady. Degenmen aqparat quraldary professor ony Qyrǵyzstanda tapty degen qate habar taratqan. Bul jańalyq áleýmettik jelilerde de qyzý talqyǵa tústi. Alaıda buǵan qazaqstandyq resmı qurylymdar ázirge jaýap bermedi.
Zertteýshiniń karar.com agenttigine bergen suhbatynda atalǵan jádiger 61 betten turatyn qoljazba ekenin aıtyp ótken. «Taıaýdaǵy Qazaqstanǵa jasaǵan saparymda qazaqstandyq zertteýshiler bizge jazbalardy kórsetken bolatyn. Zertteı kele tabylǵan nusqanyn shamamen XIV nemese XVI ǵasyrlarǵa tıesili ekenin anyqtadyq. Dálirek aıtqanda, bul nusqanyń basty ereksheligi – buǵan deıin Drezden men Vatıkannan tabylǵan aldyńǵy eki jazbadan da kóne bolýynda» deıdi Metın Ekındjı.
Professor jańa nusqanyń bilim álemine zor úles qosyp, Qorqyt ataǵa qatysty zertteýlerdi tolyqtyratynyna senedi. Dastandy túgeldeı latyn qarpimen kóshirip, túrik tiline aýdaryp, kópshilikke usyný josparlanǵan.
«Qorqyt ata» dastany – túrki álemine ortaq, qundy jádiger. Dastannyń alǵashqy eki nusqasy 1815, 1952 jyldary Germanııanyń Drezden qalasy men Vatıkannan tabylǵan bolatyn.