Álemdik standarttarǵa saı bilim berý júıesin qalyptastyra otyryp, stýdentterdiń bilim alýyna jáne turatyn jerine jaǵdaı jasaýǵa tıisti nazar aýdarý qajettigi Elbasy N.Nazarbaevtyń «Prezıdenttiń bes áleýmettik bastamasy» atty Úndeýinde aıtylǵan bolatyn. Joǵary oqý oryndary men kolledjderdiń stýdentterin jataqhanamen qamtamasyz etý máselesin sheshý úshin bilim ordalary men developerlik kompanııalar memleket pen jekemenshiktiń seriktestigi qaǵıdasymen jataqhana salýdy bastaýy kerektigi de úndeýde aıtyldy. Osy oraıda OQMPÝ rektory Ońalbaı Aıashev qurylysy aıaqtalmaı qalǵan, sáýleti jańa úlgidegi tórt juldyzdy qonaq- úıge oraılastyrylyp salynǵan nysandy jastardyń ıgiligine jaratty. Aldymen nysannyń jaı-kúıin shuǵyl anyqtap, ınvestorlarmen kelisimder júrgizgen rektor qujattardy talapqa sáıkestendirdi. Sóıtip, jataqhana jobasy daıyndalyp «Qarjy ortalyǵy» aksıonerlik qoǵamymen kelisimshart jasalyndy. Sonyń nátıjesinde óte qysqa merzimde sáýletti ǵımarat qurylysy tolyǵymen aıaqtalyp, stýdentterdiń paıdalanýyna berildi. Zamanaýı talaptarǵa saı, materıaldyq-tehnıkalyq bazasy joǵary deńgeıdegi jataqhananyń kitaphanasy men oqý zaly, demalys bólmeleri, medısınalyq pýnkt, basqa da qajetti bólmeleri stýdentterdiń sabaqtan tys ýaqytyn tıimdi ótkizýine múmkindik jasaıdy. Osydan tórt jyl buryn, ıaǵnı 2015 jyly 12 qabatty Stýdentter úıin paıdalanýǵa bergen Ońtústik Qazaqstan memlekettik pedagogıkalyq ýnıversıteti jataqhanaǵa muqtaj árbir stýdentti jaıly orynmen qamtý maqsatynda naqty jospar jasap, júzege asyrý joldaryn da aıqyndaǵan. Búginde ýnıversıtet stýdentteriniń 70 paıyzdan astamy jataqhanamen qamtylǵan. Zaman talabyna saı jabdyqtalǵan jataqhanada turý baqyty aldymen oqý úzdikterine buıyrady. Árıne muqtaj stýdentterdiń áleýmettik jaǵdaıy da eskeriledi. Sondaı-aq shetelderden kelgender jaıǵastyrylady. Stýdentter úıinde jastarǵa qajetti jaǵdaıdyń bári jasalǵan. Ár jatyn bólme eki stýdentke laıyqtalǵan jataqhanada kitaphana, ashana, arnaıy medısınalyq kabınet, hımııalyq tazartý, taǵy basqa qyzmet kórsetý bólimderi jumys isteıdi. Oǵan jastardyń bos ýaqytyn tıimdi paıdalanýy eskerilgen defıle, aıtys, estrada, folklorlyq aspaptar, beıneleý óneri, vokal, sándik óner, ulttyq aspaptar jasaý, tigin, kompıýter, taǵy basqa úıirmelerdi qosyńyz. Jastar alysqa barmaıdy, barlyǵy Stýdentter úıinen tabylady.
Qazirgi tańda Shymkenttegi 11 joǵary oqý orny, 37 kolledjde 123 myń stýdent bilim alýda. Qalada stýdentterge arnalǵan 39 jataqhana bar. Sol jataqhanalarda 7600 stýdent turady. Tıisti oryndarmen júrgizilgen jumystar nátıjesinde taǵy 8400 oryndyq jataqhana qajet ekeni anyqtalǵan. Osy oraıda Shymkenttegi jataqhana ornynyń qajettiligin joıý boıynsha ákimdik tarapynan «Turan» shaǵyn aýdanynan 8 gektar jer ýchaskesi belgilenip, «Shymkent» áleýmettik kásipkerlik korporasııasynyń ınvestısııasy esebinen «Otaý STROI» kompanııasymen birlesip, 5 myń oryndyq jataqhana salý josparlanyp otyr. Sondaı-aq jeke kásipkerler arqyly 200 jáne 350 oryndyq jataqhana salý úshin Bilim jáne ǵylym mınıstrliginiń «Qarjy ortalyǵy» aksıonerlik qoǵamymen kelisimshart túzilip, qurylys jumystary bastalǵan. Ákimdik 2021 jyldyń sońyna deıin stýdentterdi 100% jataqhanamen qamtýdy kózdep otyr, soǵan deıin Shymkentte 8 myń orynǵa jetetin jataqhana salynady. Jergilikti ákimdik 5 myń orynǵa arnalǵan jataqhanany, al 3 myń orynǵa arnalǵan nysandardy ýnıversıtetter men kásipkerler turǵyzbaq. Al OQMPÝ ujymy aldaǵy tamyz aıynda 6 qabatty 200 oryndyq Stýdentter úıin paıdalanýǵa berýdi josparlap otyr.
ShYMKENT