Kókpekti aýdanynda Keńes Odaǵynyń Batyry Qoıgeldi Aýhadıevtiń eske alýǵa arnalǵan fýtzal týrnıri máresine jetti. Bıyl besinshi márte ótkizilip otyrǵan bul týrnır bıyl qomaqty qarjylaı qoldaýymen erekshelendi.
«Batyr urpaqtary 7 aıǵa sozylǵan týrnırdiń qomaqty júlde qoryn qamtamasyz etti. Qarasha aıynda ótken jarystyń ashylý saltanatynda aýdan ákimi Ashat Smaılov óz atynan arnaıy qarjylaı júlde de taǵaıyndaǵan edi. Týrnır jeńimpazdaryn marapattaý saltanatynda sóz alǵan batyr urpaǵy Erlan Qoıgeldın bul memorıaldyń sporttyq rýhty kóterip, jigerdi tasytqannan basqa, jurtty salaýatty turmys saltyna baýlý tárizdi nasıhattyq baǵyty da bar ekenine nazar aýdardy. Jastardyń tartysty oıynyn tamashalaýǵa aýdan ákiminiń orynbasarlary Marat Temirjanov pen Dáýren Qoıgeldın, Ishki saıasat bóliminiń basshysy Bek Nuǵybaev, Sport bóliminiń basshysy Erjan Káribaev, Jastar ortalyǵynyń dırektory Azamat Halyq, máslıhat depýtattary men fýtbol jankúıerleri jınaldy.
Kókpekti orta mektebiniń sport zalynda ótken jarystyń qorytyndysy boıynsha alań ıeleri jeńimpaz atandy. Shyńǵys Shalbaev, Rýslan Júnisov, Erzat Baıahmetov bastaǵan Kókpekti orta mektebiniń quramasy - Qoıgeldi Aýhadıevti eske alýǵa arnalǵan fýtzal týrnıriniń chempıondary. Aýdan quramasynyń beldi oıynshylarynan quralǵan «Neıtral» komandasy 2 orynǵa jaıǵasty. Aıta keterligi, bul jigitter byltyr jarystyń bas júldesin oljalaǵan edi. Júldeli úshinshi oryndy aýdandyq «Juldyz – Novaıa jızn» gazetiniń quramasy qanjyǵalaryna baılady. Jeńimpazdar men júldegerler Kýbok jáne medaldarmen, qarjalaı syıylyqtarmen marapttaldy. Sonymen birge, týrnırge qatysqan basqa da quramalardyń barlyǵy marapattaý qaǵazy jáne qarjylaı syılyqqa ıe boldy», - deıdi Juldyz – Novaıa jızn» gazetiniń dırektory Darhan Berdibek.
Shyǵys Qazaqstan oblysy,
Kókpekti aýdany