Qazir aýdandaǵy sharýa qojalyqtary mal basyn kóbeıtip, egin sharýashylyǵyn da órkendetip otyr. Ásirese jylyjaı sanyn kóbeıtip, jyl on eki boıy kókónis ósirýge beıimdelgen dıqandardyń isi berekeli. Sonyń biri Saımasaı aýylyndaǵy «Abıtov» sharýa qojalyǵy. Osy aýylǵa arnaıy at basyn burǵan Májilis depýtaty Serik Úmbetov jylyjaıdyń jumysyn kózben kórdi. Almaty qaasyna jaqyn ornalasqan sharýashylyq óndirgen ónimin ótkizýge qınalǵan emes. Búginde tabıǵı topyraqta ósirilgen balǵyn qııar men qyzanaqqa suranys berýshiler qatary óse túsken eken. Osy «Abıtov» sharýa qojalyǵy saýyn sıyr ustap, sút te óndiredi. Aǵarǵanǵa da suranys bar. Demek, qojalyq úshin tabys kózi turaqty. Tabys bar jerde eńbek ónimdiligi arta bermek.
Saımasaı aýylyndaǵy «Aıdarbaev» sharýa qojalyǵynyń da tasy órge domalap tur. Sharýashylyqta mal basyn, onyń ishinde sútti sıyrdyń sany kóbeıip jatyr. Daıyn ónimdi qalaǵa jóneltedi. Turaqty tutynýshylary bar. Ekinshi jaǵynan dıqandar baý-baqsha egistigine kóńil bólip otyr. Bul da aqtalatyn eńbek.
Sapar barysynda Serik Úmbetov óńirdegi «Assorti Rancho» shaǵyn demalys aımaǵyn da aralady. Bul otbasylyq demalys ortalyǵy Saımasaı aýylynyń dál irgesindegi aıdyndy kóldiń jaǵasynda ornalasqan. Aty shaǵyn bolǵanymen, kól jaǵasy arnaıy kelip demalýshylardan bosamaıdy eken.
– Agrotýrızmdi damytýǵa ózimizshe úles qosyp jatyrmyz. Bizdiń basty maqsatymyz tynyǵýǵa kelgen adamdarǵa sapaly qyzmet kórsetý. Kelýshiler tabıǵı ónimge qyzyǵady. Tutynatyn et, sút, kókónistiń barlyǵyn ózimiz ósiremiz ǵoı. Ekologııalyq taza ónim degenimiz osy ári demalýǵa kelgen adam dán rıza bolyp qaıtady, - deıdi «Assorti Rancho» demalys ornynyń basshysy Topjar Jamalbekov.
Almaty oblysy