«IIM E.Turǵymbaevqa Atyraý oblystyq Polısııa departamenti bastyǵynyń ersi áreketine qatysty qyzmettik tekserý júrgizýdi tapsyrdym. Qatań shara qoldanylatyn bolady» degen Prezıdenttiń sózi polısııa bastyǵy áreketiniń shynymen ersiligin kórsetse kerek. Onyń ústine Q.Toqaev Qazaqstan Prezıdenti retinde osy ishki ister salasynyń jumysyna mán berip, mınıstrlik basshylyǵy men jeke quramyna syn-eskertpeleri men tapsyrmalaryn bergen edi.
Atap aıtqanda, sáýir aıynda Ishki ister mınıstrliginiń keńeıtilgen alqa otyrysyna qatysqan Qazaqstan Prezıdenti polısııaǵa qoıylatyn negizgi talap – tıimdi jumys, al onyń tıimdiligin baǵalaýdaǵy basty shart – halyq senimi ekenin aıta kele: «Turǵyndar polıseılerdiń dórekiligi men biliksizdigine baılanysty jıi shaǵym aıtady. Keıbir jaǵdaılarda polısııa qyzmetkerleriniń ózderi zańdy buzady, ásirese, jol erejelerin saqtamaıdy», – degen bolatyn.
Mine, Elbasy bastap bergen reformalardyń mańyzdylyǵy aıtylyp, ony sapaly júrgizý tapsyrylǵan jıynnan bir aı óter-ótpeste Atyraý oblystyq Polısııa departamentiniń basshysy kópshilik aldynda, saltanatty jaǵdaıda «atqa minip» shyǵa keldi.
Endi A.Dúısembaevtyń áreketiniń zańdy-zańsyzdyǵyn, eń bastysy, qaı jerden súringendigin arnaıy komıssııa anyqtaı jatar. Mınıstrliktiń baspasóz qyzmeti taratqan habarlamadan Atyraýǵa arnaıy ókildiń attanǵany belgili boldy. Onda: «Atyraý oblystyq Polısııa departamentiniń basshysy Aıan Dúısembaevqa qatysty áleýmettik jelide jarııalanǵan beınematerıal boıynsha Ishki ister mınıstrligi oqıǵa ornyna ókil attandyryp, qyzmettik tekseristi qolǵa aldy. Qyzmettik tekseris nátıjesi boıynsha zańda belgilengen tártip negizinde sheshim qabyldanady» delingen.
Árıne, halqymyzda qurmetti adamyn atqa mingizý dástúri baryn joqqa shyǵara almaımyz. Biraq mınıstrlik ókili generaldyń qatysýymen bolǵan sharanyń polısııa ádebine sáıkes kelýinen bastap tulpardyń syılyq retindegi baǵasyna deıin kóńil aýdarary anyq. О́ıtkeni sol áleýmettik jelide polısııa generalyna týǵan aýylyna barǵandaǵy kórsetilgen qurmet degen jazba qaldyrylǵan.
Biraq bul shara óńirde atty polısııa qyzmetiniń ashylý saltanaty bolýy da múmkin. О́ıtkeni at tizginin jetelep ákelgen jigittiń kıimi polısııanyń kádýilgi formalarynyń birine uqsaıdy.
Jalpy, Atyraý polısııasynyń bastyǵy A.Dúısembaevtyń qoǵam talqysyna qalyp otyrǵany birinshi ret emes. Byltyrǵy tamyz aıynda onyń shetelderdiń birindegi kazınoda bás tigip júrgendegi kóringen beınejazbalar taralyp, polısııa bastyǵy keıin óz áreketiniń zańǵa qaıshy bolmaǵanyn jáne qumar oıynǵa qatysy joǵyn aıtyp aqtalǵan. Al bul joly qandaı ýáj aıtary belgisiz.
Áleýmettik jeliniń keń taralyp, qoljetimdi bola túskeni quqyq qorǵaý salasynyń da kóleńkeli bylyqtaryn asha túskeni ras. Aıtalyq, ótken jyldyń sońynda Qaraǵandy polısııa akademııasynyń basshy laýazymyndaǵy ókili teledıdardan kórgenin istep, qylmyskerdiń keıpin somdaımyn dep qyzmetinen qýyldy.
Bir ǵana youtube.com arnasyn ashyp qalsańyz, qyzmettik forma kıgen tulǵalardyń basqa da bylyqtaryna qaryq bolasyz. Sóıte tura, beınekamerasy qýatty smartfondar, qoljetimdi áleýmettik jeli bılegen dáýirde ant bergen qyzmetkerlerdiń ersi qylyqtarynyń azaımaýyna ne sebep?