128 jyldyq tarıhy bar «Rolan Garros» týrnırinde ár dáýirdiń darboz tennısshileriniń barlyǵy da kúsh synasqan. Erler arasynda eń mol oljaǵa kenelgen Rafael Nadal ekenin jankúıerler jaqsy biledi. «Grýnt patshasy» atanǵan Ispanııanyń sańlaǵy Parıj kortynda 11 márte teńdessiz dep tanyldy. Bir ǵajaby, 2005-2018 jyldar aralyǵynda ótken 14 jarystyń tek úsheýinde ǵana oǵan bas júlde buıyrmaǵan eken. 2008 jyly Nadal tórtinshi kezeńde shvesııalyq Robın Soderlıngke ese jiberse, 2015 jyly shırek fınalda serbııalyq Novak Djokovıchten jeńildi. Al 2016 jyly óziniń otandasy Marsel Granolerske qarsy básekege shyǵýdan bas tartty. Al qalǵan dodalardyń barlyǵy Pıreneı túbegi tarlanynyń jeńisimen aıaqtaldy.
3 maýsymda 33 jasqa tolǵaly otyrǵan Rafael Nadal áli de babynda. Qazirgi kezde ol álemniń ekinshi raketkasy atanyp otyr. Ispanııalyq tennısshi týrnırdiń bas júldesinen basty úmitkerlerdiń biri ekeni daýsyz.
Tarıhqa júginsek, basqa da saqa sportshylardyń kezinde «Rolan Garrosta» atoı salǵanyn ańǵaramyz. HH ǵasyrdyń basynda fransııalyq Maks Dekıýjı 8 márte top jarsa, jetpisinshi jáne sekseninshi jyldary Born Borgtyń tasy órge domalady. Shvesııanyń áıgili tennısshisi Fransııanyń astanasynda 6 ret dara shyqty. Al áıelder arasyndaǵy saıysta Krıs Everttiń ózgelerden kóshi ilgeri. 1974-1985 jyldar aralyǵynda AQSh-tyń ókili 7 márte jeńimpaz atandy. Fransııalyq Sıýzann Lenglen (1920-1923, 1925-1926) men germanııalyq Shteffı Graf (1987-1988, 1993, 1995-1996, 1999) 6 retten bas júldeni oljalasa, aýstralııalyq Margarıt Kort 5 márte (1962, 1964, 1969-1970, 1973) dál sondaı qurmetke bólendi.
«Rolan Garrosta» talaı rekordtar tirkeldi. Máselen, 2004 jyly Fransııanyń qos sańlaǵy – Fabrıs Santoro men Arno Klemann arasyndaǵy tusakeser kezdesý 6 saǵat 33 mınýtqa sozyldy. Bul – erler arasyndaǵy eń uzaq kezdesý. 2010 jyly japonııalyq Kýrýmı Nara men rýmynııalyq Monıka Nıkoleský arasyndaǵy irikteý básekesiniń jeńimpazy 4 saǵat 42 mınýtta anyqtaldy. Al 1988 jylǵy fınaldyq saıys nebári 34 mınýtta aıaqtaldy. Bul básekede sol kezdegi álemniń birinshi raketkasy Shteffı Graf KSRO sportshysy Natalııa Zverevany 6:0, 6:0 esebimen tas-talqan etti.
1990-1992 jyldar aralyǵynda Iýgoslavııanyń áıgili oıynshysy Monıka Selesh Parıjdegi týrnırdi qatarynan úsh márte utty. Alǵashqy ret jeńiske jetken kezde ol nebári 16 jas 6 aıda edi. 1989 jylǵy jarysta amerıkalyq Maıkl Chang pen ıspanııalyq Arancha Sanches tórtkúl dúnıe jankúıerlerin tamsandyryp, bas júldeni oljalady. Sol kezderi olar 17 jastan endi ǵana asqan bozbala men boıjetken edi. Soǵan qaramastan ekeýi de fınalda ataǵy alysqa jaıylǵan tennısshilerdi utty. Atap aıtsaq, Chang shvesııalyq Stefan Edbergtiń osal tusyn tapsa, Sanches nemis sportshysy Shteffı Graftan aılasyn asyrdy.
Byltyrǵy jyly ótken týrnırde ıspanııalyq Rafael Nadal men rýmynııalyq Sımona Halep jeńiske jetti. Nadal fınalda aýstrııalyq Domınık Tımdi esh qınalmaı utty – 6:4, 6:3, 6:2. Halep amerıkalyq Sloan Stıvenske san soqtyrdy – 3:6, 6:4, 6:1. Erlerdiń juptyq saıysynda fransııalyq Nıkolıa Maıý men Per-Iýg Erberdiń baq juldyzy jansa, áıelder arasynda Chehııanyń qos sulýy – Barbora Kreıchıkova men Katerına Sınıakova ozdy. Aralas juptar básekesinde Taıpeı men Horvatııanyń tennısshileri Latısha Chjan men Ivan Dodıg dara shyqty.
«Úlken dýlyǵa» sanatyndaǵy týrnırlerdiń júlde qory da mol bolatyny belgili. Solardyń qatarynda «Rolan Garros» ta bar. Bıylǵy jyly aıtýly dodanyń júlde qory 42 661 000 eýrony qurady. Tarqatyp aıtsaq, jekelegen saıystarda jeńimpaz atanǵan tennısshiler 2 300 000 eýrony enshileıdi. Aqtyq synǵa alqynbaı jetip, sheshýshi tusta utylǵandardyń esep shotyna 1 180 000 eýro aýdarylady. Jartylaı fınalǵa jetkenderi € 590 000-ǵa baıysa, shırek fınalǵa shyqqandar sol somanyń teń jartysyn ıelenedi.
«Rolan Garrostyń» tusaýkeser kezdesýinde qapy qalǵan oıynshynyń ózi 46 000 eýrony qaltaǵa basady. Ekinshi aınalymǵa shyqsa, sol soma eki esege artady. Úshinshi kezeńge jetken tennısshige € 143 000 tıesili. Osy derekterden-aq, «Úlken dýlyǵa» sanatyndaǵy jarystardyń bedeli qanshalyqty zor ekenin ańǵarýǵa bolady.
Sol sekildi saıystyń ózge túrleri boıynsha óner kórsetken oıynshylarǵa da edáýir mólsherde syıaqy tóleý jaǵy qarastyrylǵan. Máselen, juptyq básekeniń jeńimpazy € 580 000-dy oljalasa, aralas juptar tartysynda top jarǵandar € 122 000-dy ıemdenedi. Sol sekildi jeńilgender de úılerine qur alaqan qaıtpaıdy. Olardyń da ózderiniń kórsetken óneri men jetken mejelerine saı syıaqy alady.
Qazirgi kezdegi Qazaqstannyń tańdaýly tennısshileri arasynda «Rolan Garrosta» eń jaqsy nátıjege qol jetkizgen Iýlııa Pýtınseva. Áıelder arasyndaǵy elimizdiń birinshi raketkasy eki ret shırek fınalda óner kórsetti. 2016 jyly ol AQSh-tyń ataqty oıynshysy Serena Ýılıamsten jeńilse, 2018 jyly sonyń otandasy Medıson Kıske ese jiberdi. Al Zarına Dıas jáne Mıhaıl Kýkýshkın syndy myqtylarymyz ázirge ekinshi aınalymnan asa almaı júr.