–Mańdaıly О́zenbaıqyzy, «Egemendegi» jyldar sizge nesimen qymbat?
– «Egemende» eńbek etken toǵyz jyl meniń ómirimniń dáýirge tatıtyn dáýreni der edim. Elimiz azattyq alyp, táýelsiz Qazaqstan memleketiniń irgetasy qalanyp jatqan, bardan joq kóp, dostan synshy kóp, kóńil jubatar úmitten syǵyraıyp ańdyp turǵan qater kóp sol bir almaǵaıyp zamanda Qazaqstanymyzdyń tabanyna kirgen shóńge mańdaıymyzǵa kirsin dep, qalamymyzdy qaıratymyzǵa janyp jumys istedik. Jalaqysyn aılap almaı ashynǵan, jumyssyzdyqtan, erteńgi kúnniń beımálimdiginen toryqqan, ashqursaqtyqtan ashýshań, tipti «mundaı bostandyǵyńnan qarnym toq, ýaıymym joq bodandyǵym jaqsy edi ǵoı» dep órekpigen jurtpen betpe-bet kelip, joqtyń jyrtyǵyn jamap, tigisin jatqyza, keıde bılik úshin jaýap beretinbiz, ashý aıtqanǵa basý aıtyp, qalam ushynan úmit sáýlesin jyltyratýdan taımaıtynbyz. Biz ózimizdi qaıratker sezinetinbiz, keıbir óńirde ákimin tanymaıtyn halyq «Egemenniń» tilshisin tanıtyn. 1994 jyldyń jeltoqsanynda Elbasynyń Almatydaǵy jumys kabınetinde gazettiń 75 jyldyǵyna oraı «Egemenniń» jýrnalısterin qabyldap, eldegi sol kezdegi ahýal men aldaǵy josparlar týraly emin-erkin áńgime sabaqtaı kele, «halyqtyń ortasynda júrgen sizderdiń aqparattyq qyzmetterińizdiń sapasyna, biliktilikterińizge kóp nárse baılanysty. Jergilikti jerlerde jurt birinshi kezekte oblys, aýdan, qala ákimderin, ekinshiden, «Egemenniń» tilshilerin júzbe-júz tanýy tıis» dep mindettegeni bizdiń jaýapkershiligimizdi sol deńgeıge kóterýimizge qamshy boldy. Sol jaýapkershilikti seziný bizdiń qaı-qaısymyzdyń jazatyn taqyrybymyzdyń mazmunyn jańartyp, aıasyn keńeıtip, kásibı biliktiligimizdi zamanaýı talaptarǵa saı ushtaýǵa yntalandyrdy. «Egemende» eńbek ete júrip eldi, Alashtyń azamattaryn tanydyq, ózimiz de oqyrman izdeıtindeı jýrnalıst qataryna qosyldyq.
– Ádette shynynyń ar jaǵyndaǵy minsiz álem dál sol qalpynda boıamasyz qabyldanatyndaı, kisiniń rýhanı álemi de syrttan qurǵaq sóz qurastyryp aıtýǵa kónbeıdi, ol júrek kiltin taba bilgen kisige taý sýyndaı kirshiksiz syńǵyrlap qoıa beredi dep jatamyz. Al ózińiz qazirgi adamdardyń boıynan qandaı qasıetterdi kóbirek kórgińiz keledi?
– Burynǵy adamdardyń tilimen aıtqanda, kisilikti kórgim keledi. Menińshe, bul – minezden de keń uǵymdy bildiretin, adamnyń bolmysyn aıqyndaıtyn fılosofııalyq uǵym. Baıaǵydaǵy ata-babalarymyzdyń «Adam bolar balanyń kisimenen isi bar, adam bolmas balanyń kisimenen ne isi bar?..» deýi jaıdan-jaı aıtyla salmasa kerek-aý. Iаǵnı adamdy taný, baǵalap, baýyr tutý, qadirleı bilýdiń ózi kisilik qasıetke jatady. Bizdiń zamandastarymyzdyń da, qoǵamnyń da boıynda osy kisilik kelbet kemimese eken deımin.
– О́zińizdi qazir ne tolǵandyrady? Ne jazyp júrsiz?
– Qazirgi qazaq qoǵamynyń damýynda tolǵandyratyn jaılar jetkilikti, onyń árqaısysyna toqtalyp otyrsaq áńgime uzaqqa ketedi. Bir sózben aıtqanda, barlyq ózim quralpy zamandastarym sııaqty tileýimiz – eldigimiz, irgemizdiń bútindigi, birligimizdiń beriktigi, bolashaǵymyzdyń baıandylyǵy. Qazaq halqynyń bolashaǵy jarqyndyǵyna, álemdik órkenıet kóshinen óziniń laıyqty ornyn alatynyna senimim kámil.
Ne jazyp júrmin degenge kelsek, balalyqpen óleń jazǵanym bolmasa, eseıe kele jýrnalıstıkaǵa basy bútin den qoıǵan adammyn. Aqyn-jazýshylyqty, kitap shyǵarýdy murat tutpadym.
Jýrnalıstik qyzmetten ketkenime de úsh jylǵa taıap barady, azyn-shoǵyn oılarymdy áleýmettik jelide jarııalap, jurtshylyqpen bólisip otyramyn.
– О́ńirdiń tarıhı, arheologııalyq eskertkishteri men dalanyń, tabıǵattyń ǵajaıyp naqyshy týraly áleýmettik jelide jarııalanǵan jazbalaryńyzdy oqyǵan sátte ázelgi babalarymyzdyń altyn sandyǵynyń aýzy ashylǵandaı keremet shýaqqa kenelip, kóz aldymyzdan nebir kórkem beıneler kólbep shyǵa keledi. О́mirdi shúbásiz sıpattaıtyn munshama boıaý qoryn qaıdan tabasyz?
– Men ata-ájeleri saıası qýǵyn-súrginnen jan saýǵalap, atamekennen údere kóship, Horezmniń oıynan pana tapqan, Ámýdiń jaǵasynda ómirge kelgen urpaqtyń ókilimin. Quıttaıymyzdan úlkenderden Mańǵystaýdyń oıy men qyryn en jaılaǵan eldiń burynǵy kúni, batyrlary men aqyndary, baılary men saqılary týraly armandy áńgimeler, túndi tańǵa asyra jyrlaıtyn jyrshylardan dastan-qıssalar tyńdap óstik. Olardyń qany men janyndaǵy syzdaǵan saǵynysh sezimderin tıtimdeı júregimizben uǵynyp, bólistik. Eseıe kele Mańǵystaýǵa qarap bozdaıtyn arýana kúıge matalyp, aqyry balalyǵymyz ótken jer jannaty – Jetisaıdy tastap, jastyǵymyz ótken arý Almatyǵa qaraılamastan Aqtaýdan bir-aq shyqtyq. Biraq meniń Mańǵystaý tarıhy men óneri, mádenıeti, tabıǵaty, taǵysyn taǵylar týraly biletinim onyń topyraǵynda jaralǵan tól perzentterine qaraǵanda tym az, tipti mardymsyz. Jazǵandarym áldeqalaı sátti shyǵyp, kópshilikke unap jatsa, ol ıntýıtıvtik sezimniń, ıaǵnı ishki túısiktiń tunbasy, ata-ana arqyly boıǵa sińgen saǵynysh pen sher-shemenniń syǵyndysy dep bilersiz. Bul – birinshiden.
Ekinshiden, Mańǵystaý taqyrybyna qalam tartqanda oqyrmanyń da, synshyń da kóbeıedi... Ábish aǵadan bastap, ne jazǵanyńdy, qalaı jazǵanyńdy syrttaı qadaǵalap otyratyn myqtylardyń kóptigin ishteı túısinetinsiń. Sosyn namysqa tyrysasyń, baryńdy salasyń, tańǵaldyra almasań da «munysy nesi?» degizip uıatqa qalmasyńdy oılaısyń.
– Bir áýletten qos birdeı tulǵa shyǵý – ata-ana úshin zor baqyt qoı. Mysaly, belgili aıtys aqyny, termeshi, jyrshy Mels Qosymbaıǵa ıisi qazaqtyń qurmeti sheksiz. Bul qunarly tamyrdan daryǵan qasıet pe, álde tárbıeden be?
– Melstiń qazirgi zamanǵy aıtys óneriniń bastaýynda óz orny bar tulǵa ekenine sózim joq. Al men kóptegen zamandasym sııaqty qazaq jýrnalıstıkasynyń qaı jerge salsa sol orynda adal eńbek etken qalamgerleriniń birimin. Joǵaryda aıtyp ótkenimdeı taza qazaqy, qarapaıym otbasynda tárbıelenip, óstik. Qanmen keletin qasıet bolsa ózimizden, naǵashy jurttarymyz jaǵynan taratqanda da arǵy atalarymyzda batyrlyq ta, bılik te, degdarlyq pen dindarlyq ta bolǵan desedi. О́z kózimizben kórip, úlgi tutqanymyz – ákem О́zenbaı kishkentaı kúnimizde sińlim ekeýmizdi kezek-kezek moınyna otyrǵyzyp alyp, kúnde keshkisin án salyp otyratyn. Bul týraly kezinde «Egemen Qazaqstanda» «Ákem salǵan ánder-aı» degen maqalam jarııalanyp, sony oqyǵan marqum Záýresh Esbergenova apamyzdyń arnaıy izdep kelgeni bar... Sheshem Qyrmyzy ákesi, tórt aǵasy bilimdi molda bolǵan, sharıǵattan da, qazaqy ańyz-áńgimelerden de habary moldyǵyna qosa maıyn tamyzyp áńgime aıta biletin adam edi. Bir qyzyǵynda bapamnyń balasy bolyp ósken men anamnyń áńgimesine kóp mán bermeı, kitabı sózdiń sońyna túsip kettim de, Mels qana ájesiniń áńgimeleri jurnaǵyn alyp qaldy... Ákemniń inisi Azı aǵam qoly sál bosasa, dombyrasyn alyp, adaıdyń ilme kúılerin sylqyta tartyp, ne baıaýlatyp Mańǵystaý jyr-terme, tolǵaýlarynyń maqamyn aıtyp, úıdi ásem sazǵa toltyrýshy edi. Mels tıtteı kúninen tátesiniń dombyrasy qulaǵyn tistep, áýenge ilese arqasy qozyp, qompańdap otyratyn. Aǵamyzdyń jary Qońyraý sheshemiz de kónequlaq áńgimeshildigine qosa, emsektigi bar úı-ishilik dárigerimiz edi. Osyndaı oshaq basy, ot qasynda ósken bizdiń áýlet balalarynyń shúkir, ónerden, sózden quralaqany joq derlik. Melske ilese biraz aıtystarǵa qatysqan, jazba aqyndyǵy da bar, ómirden jas ketken Nurlan baýyrymyzdyń artynda bir kitaptyq jyr-mura qaldy.
– «Tildiń ushymen emes, júregimen ún qatysa alatyn adamdar bary qandaı jaqsy».
Bul turǵyda ózińizdi joly bolǵan janmyn dep esepteısiz be?
– Atam qazaq «Adam tildeskenshe, jylqy kisineskenshe» deıdi emes pe, tildiń arqasynda qalyń elimmen túsinisip, tirshilik keship kelemin. Al júrekpen túsinisetin adamdar kim-kimde de sanaýly bolatyny sııaqty mende de bir...eki...úsh...
– Abaı «Adamnyń adamshylyǵy isti qalaı aıaqtaǵanynan emes, ony qalaı bastaǵanynan kórinedi».
Biz «О́tken dáýir jas alsa janaryna, júregiń tas ta bolsa bir jibıdi». Bul oıdy ári qaraı qalaı sabaqtaǵan bolar edińiz?
– Bul – jaqynda feısbýk áleýmettik jelisine salyp, tóreligin oqyǵandardyń ózine qaldyrǵan jazbam. Ánsheıinde árbir jazbama ún qosyp, jylt etip bir kórinip qalatyn dostarymnyń ózi ún qosa almady, áńgimeniń mánisin túsingenmen bireýleri ishten tyndy, endi bireýleri bógelmesten únsiz ótip ketti. Qaı-qaısysyn da jazǵyrar jaıymyz joq.
Qazaqta «Týǵanyńdy kórgenim joq, ólgenińe jylamaımyn» degen de sóz bar. Qazirgi keıingi tolqyn jastardyń qulaǵyna jetpegen de naqyl bolar. Qandaı jaǵdaıda aıtylsa da ońyp turǵan sóz emes. Ne de bolsa qazaqtyń baýyrmaldyǵyna, bir-birine janashyrlyǵyna kúmán týdyryp, bir-birinen boıyn aýlaq salýǵa bastaıtyn syńaıly sóz. Áleýmettik jelidegi jazbalardy zerdelep otyrsam, maǵan qazir osy sóz dáýirlep, qoly júrip turǵandaı kórinedi. Joqtan ózgeden ilik taýyp, ultyńnyń ómirden ótip ketken jaqsysy men jaısańynyń súıegin syrqyratý, tirisiniń jaǵasyna jarmasý, eline sińgen eńbeginen min taýyp, baryn joqqa shyǵaryp kústanalaý, nesin aıtasyz, raqymnan, aıaýshylyqtan jurdaı ymyrasyz jazbalar janyńdy kúızeltedi.
Arashaǵa túskendi aıamaıdy, jabylyp aradaı talaıdy, jandármen bir toqtasa Abaıdyń aıtqanyna toqtar-aý dep, Abaıǵa júginesiń... Sondaı kóńil kúıi ústindegi jazba edi.
– Pir Beket babanyń máńgilik mekeni týraly kóp jazyp júrgen tulǵanyń birisiz. Damyǵan elderde tarıhı eskertkishterdi jylyna myńdaǵan týrıster kelip tamashalap, erekshe qorǵalady. О́kinishke qaraı týrızm salasy bizde áli óz deńgeıinde emes. Bul jerde ortaǵa salaıyn degen oı – pir babamyz damyl taýyp jatqan qasıetti mekendi kórýge álem jurtshylyǵy tamsana aǵylatyndaı úlken deńgeıge qashan jetkizemiz degen másele ǵoı...
– Jalpy, bizdegi áýlıeli, kıeli oryndardy kópshilikke qoljetimdi týrıstik nysandarǵa aınaldyrý kerek degen kózqarastan basqa qaǵıda kerek pe dep oılaımyn. Bul oryndar jaı qyzyqtaý nysany emes, ómirdiń sansyz saýalyna jaýap izdep, kúızelgen adamdardyń janyna medet tabar panasy, sheksiz, shetsiz álemniń qustyń uıasyndaı jyp-jyly, jaıly, aýrasy men aıasy bólek bólshegi qalpynda saqtalǵany jón. Qalaı degende de Pir Beket ataǵa aparatyn soqpaq búginde dańǵyl jolǵa aınalǵan, Qazaqstanymyz ǵana emes, alys-jaqyn shetelderden kelip jatqan zııarat etýshilerde (týrıster deýge kelmeıdi) esep joq. Basqa áýlıe-ámbıelerge zııarattaýshylar qatary da jyldan-jylǵa kóbeıýde. Olardy adam aıaǵy jeterlikteı etýde jergilikti bılik qurylymdary da, bıznes ókilderi de óz josparlary boıynsha jumys júrgizýde.
Budan basqa Mańǵystaýda týrızmniń ekstremaldy túrlerin, teńizdegi sport pen saıahatty damyta otyryp týrıster tartý múmkindigi mol.
– Ábish aǵanyń (Kekilbaıuly) arýaǵy aldyndaǵy úlken paryzdy bútindep júrgen eńbegińiz óz aldyna bólek áńgime. «О́tken tarıhty óshirýge emes, jańa tarıhty jasaýǵa atsalysyńyz» depsiz. Bul qaǵıdany ár qazaq ustansa, qanekı. Osy arada Ábish aǵa rýhanı ortalyǵynyń qurylysy qashan aıaqtalyp, paıdalanýǵa berilmek degen suraqtyń qoıylýy zańdy?
Rýhanı ortalyq keleshekte nemen aınalysady?
– Bıyl zamanymyzdyń zańǵar jazýshysy,kórnekti memleket jáne qoǵam qaıratkeri Ábish Kekilbaıuly kózi tiri bolǵanda 80 jasqa tolar edi. Jaqynda oblysqa kelgen saparynda Memleket basshysy Qasym-Jomart Toqaev tulǵa esimin úlken qurmetpen eske alyp, Ábish aǵa merekesin respýblıkalyq deńgeıde atap ótýdi óz baqylaýyna alatynyn aıtyp, oblys basshylaryna da tıisti tapsyrmalar berdi. Buryn mundaı is-sharalardy ótkizý úshin Úkimet deńgeıinde qaýly qabyldanýshy edi, qazir qalaı ekenin bilmeımin. Ábekeńniń týǵan jerinde birqatar jumystar qolǵa alynyp, júrip jatyr. Atap aıtqanda, oblystyq tarıhı-ólketaný murajaıynyń ǵımaraty salynýda. Jazýshynyń 80 jyldyq merekesi aıasynda ol Ábish Kekilbaıuly atymen ashylyp, bolashaqta quramynda oblystyq kitaphana, teatr sııaqty óner ordalary bar rýhanı ortalyqtyń kindigi ispetti bolmaq deıdi. Sol arada jazýshynyń eńseli eskertkishi boı kótermek. Rýhanı ortalyqtyń mártebesi men atqaratyn jumysynyń baǵyttary, aýqymy keıin kele anyqtala jatar.
Al bizdiń Nurmuhan Jantórın atyndaǵy oblystyq mýzykalyq-drama teatrynyń ujymy Ábish aǵanyń ádebı muralaryn nasıhattaýdy onyń kóziniń tirisinde-aq bastap ketken.Teatr repertýarynda Ábekeńniń «Abylaı han» tarıhı dastany, «Mahabbat munarasy» lırıkalyq dramasy, osy attas shyǵarmasynyń jelisimen qoıylǵan «Shyńyraý» dramasy bar.
2016 jyly qalamgerdiń ádebı muralaryn nasıhattaý maqsatyndaǵy birinshi respýblıkalyq teatr festıvalin ótkizgen bolatynbyz. Jazýshy mereıtoıy aıasynda bıyl osy festıvaldy TÚRKSOI-men birlese «Ábish álemi» degen atpen halyqaralyq deńgeıde ótkizip, mereke máni men sánin asha túsýge laıyqty úles qosamyz dep otyrmyz. Jalpy, Ábish aǵanyń kınoǵa da, teatrǵa da suranyp turǵan týyndylary barshylyq...
– Búginde N.Jantórın atyndaǵy oblystyq mýzykalyq-drama teatrynyń óńir rýhanııatyn damytýǵa sińirip jatqan eńbegi ólsheýsiz ekeni ras. Onyń táýelsizdik jyldarynda dúnıege kelýiniń ózi kóp oıǵa jeteleıdi. Suraıyn degenimiz, jalpy teatrdyń ashylýyna kimder atsalysty, ol sát nesimen este qaldy?
– Teatr – tosyndaý jaǵdaıda ómirge kelgen óner ordasy. Ol kezde «Egemenniń» Mańǵystaýdaǵy tilshisimin. 2001 jyldyń qyrkúıek aıynda Aqtaýda jastardyń úlken forýmy ótti. Sol kúnderi Mańǵystaýda jumys saparymen júrgen Elbasynyń jastarmen kezdesýi josparlanǵan eken. Nursultan Ábishuly men jastar arasynda hattamalyq formada júrip jatqan áńgimege zaldyń ortasynan qolyn kóterip, «ruqsat etińizshi» dep ornynan turǵan ádemishe boıjetken aralasa ketti. Qaz-qatar otyrǵan úlkendi-kishili sheneýnikter ne aıtyp qoıady degendeı úrpıisip qaldy.
– Al aıta ǵoı, – dedi Elbasy.
– Bizdiń qalamyzda baratyn mádenıet oryndary kóp emes, – dedi boıjetken. –Sonyń ishinde teatr joq. Bizge teatr salyp berýge kómektesińizshi...
– Mine, kórdińizder me? – dedi Nursultan Ábishuly zalda otyrǵan sheneýnikterge qarap. – Ne oblys, ne mınıstrlik Mańǵystaýǵa teatr kerek dep suraǵan joqsyzdar. Al halyqqa, myna jastarǵa eki qolǵa bir jumys qana emes, rýhanı ósý úshin teatr da kerek eken! Salýymyz kerek, – dep sol arada oblys ákimi L.Qıynovqa tapsyrma berip, qurylysty óz qadaǵalaýyna aldy. Qıyn-qystaý kez edi ǵoı, bardan bólip, joqtan jonyp degendeı teatr az ýaqytta salynyp, 2003 jyly Naýryz merekesi kúni sahna shymyldyǵyn «Qyz Jibek» jáne «Tomırıs» spektaklderimen ashty.
– «Teatr – adamnyń ózin-ózi sahnadan kórip, ózin-ózi túsinetin orny» degen qaǵıda bar emes pe? Sol aıtqandaı, kóp adam munda shólirkep, ózine rýhanı azyq alyp qaıtý úshin bas suǵatyny málim. Osy jaǵynan teatr qoıylymdary jurtshylyqtyń talap-talǵamyna saıma-saı deı alasyz ba?
– Teatr ótken on alty jylda júzden astam túrli janrdaǵy týyndylardy sahnaǵa shyǵardy. Bul – az jetistik emes. Mártebesine saı mýzykalyq ta, dramalyq ta qoıylymdardy qatar alyp keledi. Degenmen, taqyryptyq jaǵynan tarıhı jáne álemdik klassıkanyń shoqtyǵy bıik shyǵarmalary basym. О́zi de neshebir patshalar men qolbasylardyń bolmysyn somdaýdyń sheber úlgisin qaldyrǵan Nurmuhan Jantórın teatrynyń kıeli sahnasynan Tomırıs patshaıym, Gamlet hanzada, Lır patsha, Shyńǵys qahan, Aleksandr Makedonskıı, Abylaı han men Ábilqaıyr han, taǵy da basqa kóneden jetken jáne kúni keshegi Alashorda úkimetiniń basshysy Álıhan Bókeıhanovqa deıingi kesek tulǵaly keıipkerler, ııa bolmasa Mańǵystaý qudyqshylarynyń eńbekqor padıshasy Eńsep búgingi kórermenmen syrlasyp, muńyn bólisip, zaryn aıtyp jatady. Nemese kórermendi óz dáýirine kóshirip, máńgilik pen jalǵanshy, mártebe men mansap, dańq pen daqpyrt, ar men jan tazalyǵy, zulymdyq pen mahabbat, qorqaýlyq pen jemqorlyq, satqyndyq pen adaldyq sııaqty sanaly adam balasymen birge jasasyp kele jatqan uǵymdarǵa eshbir ýaqyt shekara emestigin jaıyp salady, saqtandyrady... Patshalar, patshaıymdar, hanshaıymdar, bekter men batyrlar, aqyndar men sýretshiler, danyshpandar men ǵashyqtardyń bári ótken dáýirlerde qalyp ketkeni ókinishti-aq... Olardan jetken muń men zar, mahabbat pen súıispenshilik, qýanysh pen ýaıym, aıarlyq pen adaldyq bizden keıin de jalǵasyp, adamzat balasyna qansha ýaqyt joldas bolaryn kim bilsin... Mine, bizdiń teatrdyń qoıylymdaryn kórgen soń osyndaı oı keshesiz. Mýzykalyq, dramalyq qoıylymdardyń kórermenge syılar áseri ózinshe bir olja!
Qalaı degende de Jantórın teatrynyń az ýaqyt ishinde kishkene otaýdan respýblıkadaǵy irgeli óner ordalarynyń birine aınalǵany – búginde moıyndalǵan shyndyq. Sáýirde Shymkent pen Almaty qalalaryndaǵy gastroli úlken anshlagpen ótken teatr ujymy týraly Qazaqstan teatrlary assosıasııasynyń prezıdenti, ulttyq teatr jáne kıno óneriniń abyzy Asanáli Áshimovtiń: «Ákemteatr men Q.Qýanyshbaev teatrynan keıingi úshinshi teatr» dep baǵa berýi ujym úshin úlken mártebe sanalady.
– Munshama zor tabysqa jetýiniń syry nede dep oılaısyz?
– Teatrǵa irgesi qalanǵan kúnnen beri Qazaqstannyń eńbek sińirgen qaıratkeri Nurnııaz Muhanov basshylyq jasap keledi. Bas rejısseri jáne kórkemdik jetekshisi – Qazaqstannyń eńbek sińirgen qaıratkeri Gúlsına Merǵalıeva. Ekeýi de ulttyq, tipti TMD men TÚRKSOI aýmaǵynda tanymal jandar. Eksperımentaldy-tájirıbelik qoıylymdarǵa batyl baryp, jańashyldyqpen jumys isteıdi. Teatr halyqaralyq baıqaýlarda bes ret Gran-prı ıelendi. Respýblıkalyq baıqaýlarda onǵa jýyq atalym boıynsha júldeger atandy. Jalpy, o bastan-aq maǵan osyndaı tatý-tátti, yntymaǵyna shyǵarmashylyq izdenisi men berekeli isi jarasqan ujymdarda eńbek etýdi násip etken Jaratqanǵa shúkirligim sheksiz!
Áńgimelesken Qarashash TOQSANBAI,
«Egemen Qazaqstan»