Atyraýda ótip turatyn osy dástúrli jarystyń bedeli jyldan jylǵa artyp keledi. Oǵan elimizdiń jáne alys-jaqyn shet memleketterden kelgen kóptegen bylǵary qolǵap sheberleri qatysýda. Máselen, byltyrǵy básekede 10 bas júldeniń jeteýin óz órenderimiz oljalady. Olar – Qýanysh Dúısenbaı (52 kılo), Asyljan Oraqbaev (60 kılo), Asqar Erýbek (64 kılo), Raı Seıitjanov (69 kılo), Azamat Baqytov (81 kılo), Temirlan Qabıev (91 kılo) jáne Esenáli Shýnǵarın (+91 kılo). Qalǵan altyndy ırandyq Omıd Ahmadsafa (49 kılo), Mońǵolııadan kelgen qandasymyz Nurlan Asqar (56 kılo) jáne reseılik Tımýr Karefov (75 kılo) jeńip aldy.
Bıylǵy jarystyń basty juldyzdary – Abylaıhan Júsipov (69 kılo) pen Ábilhan Amanqul (75 kılo). Byltyr Aqtaýda Qazaqstan chempıony atanǵananan keıin olar birqatar dúbirli dodalarǵa qatysqan joq. Sebebi, jaraqat alyp, em-dom qabyldady. Sonyń saldarynan ekeýi de Azııa chempıonatynan tys qaldy. Mine, endi ataqty boksshylarymyz qaıta qatarǵa qosylyp, Atyraýdaǵy týrnırde kúsh synasqaly jatyr.