Temir tulparlar báıgesi márege jetti

 Aqtaý qalasynda teńiz ja­ǵalaýynda FIA Halyqaralyq Avtomobıl Federasııasynyń «Rallı Qazaqstan – 2019» rallı-reıdter boıynsha Álem Kýbogy kezeńiniń saltanatty máresi ótti. Shıeleniske toly jarys jolynyń qorytyndysy boıyn­sha qatarlyq avtoshabandoz Nasser Ál-Attııa shtýrmany Mate Bomelmen birge jeńis toıyn toılady, ekinshi oryndy erli-zaıypty Stefan men Andrea Peteranselderdiń ekıpajy ıelense, úzdik úshtikti Iаkýb Pshıgonskı men Tımo Gottshalk túıindedi.

Sońǵy sheshýshi altynshy kezeńde shabandozdar Kaspıı teńiziniń jaǵalaýy syzyǵynyń boıymen Aqtaý qalasynan sol­tústikke qaraı ótken eń qysqa 148 shaqyrymdyq arnaıy ýchas­keden ótti. Jarystyń sońǵy kúni Bernhard ten Brınken men Tom Kolsýldyń komandasy úzdik nátıje kórsetti. Bul komanda keshegi sátsizdikten keıin júldeli orynnan alshaqtaǵan bolatyn. Márege ekinshi bolyp fransýz Stefan Peteransel jetti. Jarys­tyń favorıti Nasser Ál-Attııa kúnniń úshinshi nátıjesin kórsetti.

Alty kezeńniń qorytyndysy boıynsha Toyota Hilux avto­kó­liginde óner kórsetetin, «Da­kar» rallı-marafonynyń qa­zirgi jeńimpazy Nasser Ál-Attııa «Rallı Qazaqstan – 2019» kezeńinde top jardy. Buǵan jarystyń aldyńǵy kúnderinde qol jetkizilgen qarsylastardan artyqshylyq kóp áser etti. Osylaısha qatarlyq «Rallı Qazaqstan» kezeńiniń eki dúrkin jeńimpazy atandy.

– Men «Rallı Qazaqstanda» top jarǵanyma shyn qýanysh­tymyn. Birinshilikte kósh bas­tap turmyz, bul – naǵyz fantastıka. Endi Marokko rallıin kútemiz. Álbette, bul – biz úshin jaqsy jyl, alty jarys jáne alty jeńis. Biz sońǵy ýchaskeni oıdaǵydaı óttik, barlyǵyn baqy­laýymyzda ustadyq, – deıdi «Ral­lı Qazaqstan – 2019» jeńim­pazy Nasser Ál-Attııa.

«Dakar» rallı-marafo­nyn­daǵy jeńister sany boıyn­sha rekordshy, «Rallı Qazaqstan – 2019» kezeńiniń debıýtanty Stefan Pe­teranselge jeńiske nebári 5 mı­nýttan astam ýaqyt jetpedi.

– Búgin biz Kaspıı teńiziniń jaǵasynda máre syzyǵyn kestik. Sóz joq, ádemi peızajdar, tamasha jaǵajaı. Birinshi kúni biz kólik dóńgeleginiń tesilýimen kóp ýaqyt joǵaltyp aldyq. Sodan keıin, úlken qatelikterge boı aldyrmadyq, – dep áserimen bólisti Stefan Peteransel.

Aty ańyzǵa aınalǵan shaban­dozdyń jubaıy jáne shtýrmany Andrea Qazaqstan joldaryndaǵy rallıdiń jyldamdyǵyna tań­ǵalǵanyn aıtady. Biz keıde sa­ǵatyna 200 shaqyrymnan as­tam jyldamdyqpen júrdik. Mun­daı jaǵdaıda durys navıgasııa berý ońaı emes. Men «Rallı Qa­zaqstannan» úlken tájirıbe aldym, dedi Andrea Peteransel.

Mańǵystaýdaǵy rallıde qa­zaq­standyq pılottar men shtýr­­mandar rallı-reıd áleminiń úzdik ókilderimen taıtalasty, sondaı-aq rallı-reıd boıynsha Qazaqstan Respýblıkasy Kýbogynyń Ulttyq esebin anyqtady. Al qazaqstandyq komandalar úshin eń úzdik nátıje Andreı Cherednıkov pen shtýrman Ignat Falkovtyń ekıpajymen qol jetkizilgen 6-shy oryn boldy.

– Bıyl «Rallı Qazaqstan – 2019» taǵy bir márte orasan zor halyqaralyq jarysqa aınaldy. Qazaqstan alǵash ret 2017 jyly osy bedeldi Álem Kýbogynyń kezeńderiniń birin ótkizý quqy­ǵyna qol jetkizdi jáne sol ýaqyttan bastap biz jyl saıyn rallı-reıdti uıymdastyrýda jańa deńgeıge shyǵýǵa umty­lamyz. Jarystyń barlyq qaty­sýshylary marshrýtqa jáne navıgasııaǵa, sondaı-aq «Rallı Qazaqstan – 2019» dodasynyń jalpy atmosferasyna dán rıza boldy dep senimmen aıta alamyz. Qazaqstandyq sportshylar tájirıbesin arttyrýda, al elimizdegi avtosporttyń damýy álemdik arenada elimizdiń oń ımıdjin qalyptastyrýǵa septigin tıgizýde, – dep atap ótti Qazaqstan Avtomotosport federasııasynyń prezıdenti Marat Ábiqaev.

T2 sanatynda Toyota Land cruiser avtokóligin tizginde­gen taǵy bir qatarlyq shabandoz Mohhammed Ál-Meer dara shyqty. Ekinshi oryndy túrkimenstandyq Shamyrat Gýrbanovtyń ekıpajy ıelendi. Al bul serııanyń qola júldesine qazaqstandyq «Aktau Motorsport» komandasynyń ókil­deri Kırıll Chernenkov pen Alekseı Mýn qol jetkizdi. Aqtaý avtojarysshylary jarystyń barlyq kúni jaqsy óner kór­setti, biraq rallı sporttyq ere­jelerin saqtamaǵany úshin alǵan kóp saǵattyq penalızasııa­lar ekıpajǵa budan da joǵary oryndarǵa úmitker atanýǵa múm­kindik bermedi. Jalpy esepte T3 sanatynda Brazılııadan kelgen avtojarysshy Reınaldo Varelaǵa teń keler shabandoz bolmady. Ispanııa eliniń ókili Hose Lýıs Pena Kampo jalpy esepte kóshbasshydan bir jarym saǵatqa jol berip, ekinshi orynǵa taban tiredi.

«Rallı Qazaqstan – 2019» Ulttyq esebinde «KAmAZ-mas­ter» komandasy men pılot Dmı­trıı Sotnıkov jeńiske jetti. Ekinshi jáne úshinshi oryndardy «GAZ Reıd Sport» komandasynan Mıhaıl Shklıaev pen Alekseı Hlebovtyń ekıpajdary ıelendi.

Endi pılottar 2019 jylǵy rallı-reıd boıynsha qazan aıynda Marokkoda ótetin FIA Álem Kýbogynyń kelesi jáne sońǵy kezeńine daıyndalmaq.

Mańǵystaý oblysy