Saltanattyń sýtaj óneri

Zamanǵa beıimdelgen qyz-kelinshekterimizdiń quraq qu­raýǵa, tekemet basýǵa, bir qarys jip­siz-aq, júnnen tamasha kıim úlgilerin jasaýǵa degen qul­shynystary qaıta oıanǵanyn kórip júrmiz. On saýsaǵynan óneri tamǵan zamandastardyń ismerligi tánti bolýǵa turarlyq. Daralyqqa bastaıtyn bul óner talaı daryndy abyroıǵa bólep, asyrap otyr.

Jibek, altyn, kúmis tústi jip­termen zerlenip, asyl, tabıǵı tastarmen kómkerilip jasalatyn sýtaj ónerine den qoıǵan Saltanat bala kúninen ónerge jaqyn boldy. 7-8-synypta oqyp júrgende qaladaǵy týystarynyń úıine qydyryp kelip, aýyldy saǵynyp salatyn sýretteri áli jadynda. Saltanattyń sal­ǵan sý­retterin kórgen nemere áp­kesi anasyna «Qyzyńyz sýret­ti jaqsy salady eken, dızaın ma­mandyǵyna oqytqanyńyz jón», – dep ke­ńes bergen. Ulttyq bir­yń­ǵaı testileýden úrikken sol kezeń­degi talaı oqýshy sııaqty, Sal­tanat ta 9-synypty bitirip, kolledjge qujat tapsyrýǵa she­shim qabyldaıdy. 

Anasy bul sheshimin quptap, ekeýi Almatyǵa kelip Oral Tań­­­syqbaev atyndaǵy sándik-qoldanbaly óner kolledjine qujat tapsyrdy. Saltanat óz ma­mandyǵyn tańdaýda qa­telespepti, arnaıy sýret mek­tebin bitirip kelgen ul-qyz­dar­dan qalmaı, «Sándik teatr óneri» mamandyǵy boıynsha kolledjdi úzdik bitirip shyqty. О́z isine myǵym, bastaǵan isin aıaqsyz qaldyrmaıtyn qazaq­tyń qarshadaı qyzy budan ári oqýyn «Symbat» sán akademııa­synda jarnama dızaıny maman­dyǵy boıynsha jalǵady.

Qazir Saltanat Amangeldi­qyzy turmysta. О́sken-óngen úl­ken áýlettiń ıbaly kelini. Jubaıy Erik Dúısembaev Qa­zaq­­tyń M.Áýezov atyndaǵy mem­lekettik akademııalyq drama teatrynda qoıýshy-sýretshi. Saltanat óz mamandyǵy boıyn­sha emes, aýrýhanada jumys istep júrse de, súıikti isin tastamaı el ishinde sýtaj dep atalyp ketken qolónermen aınalysyp, qyz-kelinshekterge arnap túrli áshekeıler jasap júr. Jasaǵan áshekeıleri kózdiń jaýyn alady. Olardaǵy tústerdiń úılesimi men talǵam náziktigi adamdy bir­den baý­raıdy. «Sheberdiń qoly or­taq» degen halqymyz da­ryn­dy adamnyń zaman aǵy­my­na saı túrlengen ónerdiń bar­lyǵyn meńgere alatynyn boljasa kerek. Saltanat ta zaman aǵymyna saı, jańa óner túrin óz kúshimen meńgerip, óz qııalymen áshekeılerdiń dızaınyn týdyrady. Onyń qolynan shyqqan zattar kip-kish­kentaı bolǵanmen, ony jasaý úshin temirdeı tózim men ıneniń kózinen ótkendeı yjda­ǵat­tylyq kerek ekenin ańǵarý qıyn emes.  Endeshe, búgin Saltanattyń sheber qoly men ushqyr qııa­lynan shyqqan áshekeılermen tanysyńyzdar.