«Aq jelken» qonaqúı kesheninde bolǵan kezinde oblys ákimi E.Marjyqpaev qalanyń bas jobasyna baılanysty Qopa kólin jaǵalaı salynatyn zamanaýı qurylys josparymen egjeı-tegjeıli tanystyrdy. Kól jaǵalaýy abattandyrylyp, kópqabatty úılermen qatar, áleýmettik-turmystyq qyzmet kórsetetin san alýan nysandar boı kótermek. Kenesary kóshesinen bastaý alatyn keń dańǵyl jaǵalaýdy janaı ótip, «Vasılovka» shaǵyn aýdanyna deıin sozylady. Bul joba qala kórkin kirgizýmen qatar, baspana máselesin sheshýge oń áser etpek.
Jergilikti jerde ónim óndirý óte mańyzdy. Qaladaǵy «Dva Kıta» jaýapkershiligi shekteýli seriktestigi jıhaz jasaýmen aınalysady. 2003 jyldan bastap jumys istep kele jatqan kásiporyn 2015 jyly osy zamanǵy ozyq tehnologııamen jumys isteýge múmkindik beretin jańa qural-jabdyqtaryn satyp alyp, jańǵyrý satysynan ótken bolatyn. Búginde kásiporynnyń buıymdary elimizde jáne Reseıdiń saýda núktelerinde suranysqa ıe.
Munan soń Premer-Mınıstr A.Mamın «KamAZ-Injınırıng» aksıonerlik qoǵamynyń tynys-tirshiligimen tanysty. Elimizdegi kólik shyǵarý óndirisine qomaqty úles qosyp otyrǵan kásiporynnyń jyldyq qýaty 3 myń kólikke teń. О́ndiris qýatyn barynsha arttyryp otyrǵan kásiporyn 2005 jyldan beri jumys isteıdi. Kásiporyn shyǵarǵan kólikterdi Qazaqstannyń kez kelgen jerinen kezdestirýge bolady. Búginde 700-den asa adam jumys isteıtin kásiporyndaǵy ortasha jalaqy – 150 000 teńge.
Kásiporynda Premer-Mınıstrge Qazaqstannyń óndiris oshaqtarynda birinshi ret shyǵarylyp otyrǵan múgedekter arbasynyń tanystyrylymy ótkizildi. Bul endigi arada múmkindigi shekteýli adamdardyń qajettiligin óteıtin bolady. Ádette mundaı buıymdar Reseı men Qytaıdan, Eýropa elderinen jetkiziledi. Bul jolǵy arba Eńbek jáne halyqty áleýmettik qorǵaý mınıstrliginiń tapsyrysy boıynsha daıyndalǵan. Zaýyt qazir alǵashqy partııany pysyqtaý ústinde.
– Bul elektr qýatymen júretin kólik, salmaǵy 70 kıloǵa taıaý. Arbaǵa eki akkýmýlıator ornalastyrylady. Onyń árqaısysynyń qýaty 15 shaqyrym jol júrýge ábden jetkilikti. Eki akkýmýlıatormen otyz shaqyrym jer júre alady. Jyldamdyǵy saǵatyna 6 shaqyrymǵa teń,– dep atap ótti «Tynys» aksıonerlik qoǵamynyń konstrýktorlar bıýrosynyń basshysy Sergeı Iýdın.
Sóz arasynda múgedekter arbasyna qajetti qosalqy bólshekterdiń barlyǵy osy kásiporynnan shyǵarylatynyn aıta ketýimiz kerek. «Tynys» aksıonerlik qoǵamynda ushaqtar men tikushaqtardyń jabdyqtaýshy bólshekterimen qatar Qazaqstan Respýblıkasynyń kúshtik qurylymdaryna qajetti qural-jabdyqtar da daıyndalady. Brondy keýdesheler eksportqa shyǵarylady. Azamattyq baǵyttaǵy ónim túrleri de az emes. Máselen, kásiporynnyń órt sóndirý quraldaryna, polıetılen qubyrlaryna suranys kóp. Sondaı-aq munaı ónerkásibi men taý-ken baıytý salalary, «Qazaqstan temir joly» aksıonerlik qoǵamy tarapynan da tapsyrystar túsýde.
«KamAZ-Injınırıng» aksıonerlik qoǵamy oblys ortalyǵyndaǵy asa iri Qazaqstan-Reseı birlesken kásiporny sanatynda. Bul jerde júk kólikteri, arnaıy tehnıkalar jınalýda.
– Eger óndiris kólemi týraly aıtatyn bolsaq, avıasııaǵa qajetti zattar 30-40 paıyz tóńireginde. Qalǵany ulttyq kompanııalardyń ótinimderi, – deıdi marketıng bóliminiń basshysy Erden Aıýpov.
Sapar sońynda oblystyq ákimdikte óńirdiń áleýetin arttyrý máselelerin jan-jaqty talqylaǵan keńes ótkizildi.
KО́KShETAÝ