Bul jaıtqa biz beker nazar aýdaryp otyrǵan joqpyz. Tórt jylda bir ótetin Olımpııa oıyndaryna qatysatyn dzıýdoshylar dál osy reıtıngi arqyly anyqtalady. Tarqatyp aıtsaq, ár salmaqtyń 18 úzdigi Olımpıada joldamasyna birden ıelik etedi. Odan keıin qurlyqtar arasyndaǵy tepe-teńdikti saqtaý maqsatynda qosymsha 100 joldama taratylady. Olar dzıýdo kúresiniń damýyna kóńil bólip jatqan jer jahandaǵy ár memlekettiń ókilderine beriledi. Erler men áıelderdi qosa alǵanda ǵalamdyq dodada barlyǵy 352 tatamı sheberi baq synaıdy. Al eger bir memlekettiń birneshe ókili úzdikter qatarynan kóringen jaǵdaıda, joldama reıtıngte eń joǵary oryndy ıelengen balýanǵa buıyrady.
Qazaqstannyń erler quramasy músheleri arasynan eń joǵary orynda el maqtanyshy Eldos Smetov tur. 60 kılo salmaqta kúsh synasyp júrgen Rıo Olımpıadasynyń kúmis júldegeri, álem jáne qurlyq chempıony, Azııa oıyndarynyń jeńimpazy qazirgi kezde altynshy oryndy ıelenýde. Byltyr Bakýde ótken dúnıejúzilik dodada 66 kılo salmaq dárejesinde beldesip, kúmis medaldi moınyna ilgen Erlan Serikjanov jetinshi satyǵa jaıǵasty. Qurlyqtyń deńgeıdegi resmı jarystarda san márte jeńis tuǵyryna kóterligen 90 kılo salmaqtaǵy Islam Bozbaev 10 orynǵa taban tiredi. Sonymen qatar, taǵy tórt qandasymyz «TOP-20» balýannyń qatarynda. Ǵusman Qyrǵyzbaev (60 kılo) pen Eldos Jumaqanov (66 kılo) 12 oryndardy enshilese, Dıdar Hamza (81 kılo) – 16 jáne Jansaı Smaǵulov (73 kılo) – 19 satylarǵa turaqtady.
Bizdiń eń olqy soǵyp turǵan tusymyz – alyptarymyzdyń álsizdigi. Máselen, +100 kılo salmaq dárejelerinde aıqasatyn Erasyl Qajybaev qazirgi kezde nebary 33 oryndy, al 100 kılo salmaqtaǵy Aıbek Serikbaev pen Vıktor Demıanenko 61 jáne 64 oryndardy qanaǵat tutýda. Eger aldaǵy ýaqytta olar qarqyndaryn kúrt kúsheıtpese, Olımpıada dýynan shet qalýlary ábden múmkin.
Áıelder arasynda jalǵyz ǵana Otgonseseg Galbadrah «TOP-10» dzıýdoshynyń qataryna enýde. 48 kılo salmaqtaǵy qaısar qyz toǵyzynshy oryndy oljalaýda. Al ózge arýlarymyzdyń qarqyny tym baıaý.
Osydan shamamen bir aı buryn «Egemen Qazaqstan» gazetinde «Grýzınderdiń dańqy dúrkirep tur» degen maqala jaryqqa shyqqan edi. Sol maqalamyzda túrli memlekettiń týy astynda óner kórsetip júrgen aıtýly ulttyń bes birdeı ókili álemdik reıtıngte kósh bastap turǵanyn tamsana jazdyq. Qazir de olar óz tuǵyrlarynan taıǵan joq. Atap aıtsaq, Grýzııa ulttyq quramasynyń músheleri Vaja Margvelashvılı (66 kılo), Varlam Lıpartelıanı (100 kılo) jáne Gýram Týshıshvılı (+100 kılo) óz salmaq dárejelerinde teńdessiz dep tanylýda. Sondaı-aq, reseılik Robert Mshvıdobadze (60 kılo) men ıspanııalyq Nıkolaz Sherazadıshvılı (90 kılo) de shashalaryna shań juqtyrmaı keledi. Qalǵan eki salmaqta ázirbaıjandyq Rýstam Orýdjev (73 kılo) pen ırandyq Saıd Mollaeıdiń (81 kılo) mereıi ústem.
Búgingi tańda erlerdiń álemdik reıtınginde Reseı men Japonııa qurama komandalary músheleriniń qarasy mol. Reseılikterdiń – 9, japondardyń – 8 jigiti «TOP-10» dzıýdoshy sanatynda. Mońǵolııanyń – 6, Grýzııa men Izraıldiń – 5, Brazılııa men Ońtústik Koreıanyń – 4, Qazaqstan, Ázirbaıjan jáne Gollandııanyń – 3 óreni myqtylar tizimine qosyldy. Al áıelder arasynda Japonııanyń – 3, Fransııanyń – 2 jáne Brazılııa men Kýbanyń – 1 balýany álemdik reıtıngte kósh basynda keledi.