Arysqa ketken qoǵamdyq kólikterde shamamen 5 jarym myńǵa tarta adam otyrǵyzylǵan. Máselen, ortalyq meshitten 15-ke tarta qoǵamdyq kólikpen 400-den asa minip ketti. Ol azamattar osy jerdegi aǵaıyn-týystarynyń úılerinen kelip, ketip jatqandar bolatyn. Arysqa qaıtýshylardyń qatary ýaqyt sanap ósýde. Budan basqa ózderiniń kólikterimen ketip jatqan azamattar da bar.
«Ol azamattardy Arysqa barǵannan keıin jaýapty qyzmetkerler kútip alýda. Oǵan arnaıy bekitilgen qyzmetkerler bar. Olardy ózderiniń qonystaryna jaıǵastyryp jatyr. Birinshi kezekti tamaq máselesi sheshilgen. Sodan keıin úıi qırap qalǵan azamattarǵa ýaqytsha turý máselesi de sheshilip jatyr. Ol úshin barlyq qala-aýdan ákimderi kvartalǵa bólingen. Osy tártip boıynsha tıisti jumystar júrgizilýde», deıdi Túrkistan oblysy ákiminiń keńesshisi Ulasbek Sádibekov.