"Baqytjan Ábdiruly Saǵyntaev Almaty qalasynyń ákimi bolyp taǵaıyndalsyn", - delingen Jarlyq mátininde.
Baqytjan Ábdiruly Saǵyntaev 1963 jyly 13 qazanda dúnıege keldi. Jambyl oblysynyń Úsharal aýylynda týǵan. S.M.Kırov atyndaǵy Qazaq memlekettik ýnıversıtetiniń fılosofııa-ekonomıka fakýltetin bitirgen. 1985 jyldan - Almaty halyq sharýashylyǵy ınstıtýtynyń saıası ekonomııa kafedrasynyń meńgerýshisi. 1988 jyldan S.M.Kırov atyndaǵy Qazaq memlekettik ýnıversıtetiniń áleýmettaný kafedrasynda assıstent, aǵa oqytýshy, dosent. 1992 jyldan kommersııalyq qurylymdarda basshylyq jumystarda boldy. 1998 jyldan - Jambyl oblysy ákiminiń orynbasary. 1999 jyldan - QR shaǵyn bıznesti qoldaý agenttigi tóraǵasynyń orynbasary. 2000 jyldan - «Shaǵyn kásipkerlikti damytý qory» JAQ basqarma tóraǵasy. 2001 jyldan QR Tabıǵı monopolııalardy retteý, básekelestikti qorǵaý jáne shaǵyn bıznesti qoldaý agenttigi tóraǵasynyń birinshi orynbasary. 2004 jyldan - QR Tabıǵı monopolııalardy retteý agenttiginiń tóraǵasy. 2007 jyldan - QR Premer-Mınıstri Keńsesiniń basshysy. 2008 jyldan - Pavlodar oblysynyń ákimi. 2012 jylǵy qańtardan qyrkúıekke deıin - QR Ekonomıkalyq damý jáne saýda mınıstri. 2012-2013 jyldary - «Nur Otan» partııasy Tóraǵasynyń birinshi orynbasary qyzmetterin atqarǵan. 2013-2016 jyldary - QR Premer-Mınıstriniń birinshi orynbasary qyzmetin atqardy. 2016-2019 jyldary - QR Premer-Mınıstri. 2019 jyldyń 24 naýryzynan osy ýaqytqa deıin QR Prezıdenti Ákimshiliginiń basshysy boldy. «Qurmet» ordenimen, «Qazaqstan Respýblıkasynyń táýelsizdigine 10 jyl» (2001), «Qazaqstan Konstıtýsııasyna 10 jyl» (2005), «Qazaqstan Parlamentine 10 jyl» (2006), «Astananyń 10 jyldyǵy» (2008) medaldarymen marapattalǵan.