Jıyn barysynda OQMÝ rektory ońtústik óńirdegi irgeli oqý ornynda atqarylyp jatqan ilkimdi isterdi atap ótip, aldaǵy josparlary jaıynda baıandady. Sondaı-aq ol mass-medıanyń qoǵamdaǵy orny týrasynda áńgimeledi.
– Áýezov ýnıversıtetinde bolyp jatqan mańyzdy oqıǵalar, bilim-ǵylym salasyndaǵy tyń jańalyqtar, ǵalymdardyń ǵylymı-ınnovasııalyq jobalary rýhanı-tanymdyq turǵydaǵy mańyzdy aqparattardy jurtshylyqqa durys jetkizý isinde baspasóz salasy mańyzdy ról atqarady. Sebebi, jalpyǵa ortaq aqparattandyrý ǵasyrynda naqty aqparat negizgi basymdyq ári qundylyq bolyp sanalady, – dedi Darııa Qojamjarova.
Ýnıversıtet basshysy óz sózinde mass-medıa óziniń «tórtinshi bılik» retindegi joǵary mártebesin rastaı otyryp, onyń qazaqstandyq patrıotızmdi nyǵaıtýǵa, qoǵamdyq kelisim men etnosaralyq tatýlyq qundylyqtaryn bekemdeı túsýge, memleket pen qoǵamnyń ózekti problemalaryna jedel ún qatýǵa serpindi úles qosyp kele jatqandyǵyn atap ótti.
– 75 jyldyq tarıhy bar ordaly oqý orny kóptegen bıik belesterdi baǵyndyrýda. Al, bul rette ýnıversıtet pen halyqtyń arasyndaǵy altyn kópir bolyp júrgen Sizderdiń eńbekterińiz eleýli úlken ekenin atap ótken abzal, – dedi Darııa Perneshqyzy.
Jıyn sońynda OQMÝ rektory aımaqtaǵy birqatar respýblıkalyq aqparat quraldarynyń menshikti tilshileri men óńir jýrnalısterin «Alǵys hatpen» marapattap, syı-sııapat kórsetti.
Olardyń qatarynda «Habar» telearnasynyń menshikti tilshisi Nurbek Baıbosyn, Qazaqstan Ulttyq arnasynyń menshikti tilshisi Ǵanı Qalmaqanov, Egemen Qazaqstan gazetiniń menshikti tilshisi Nurshat Tóken, «KTK» telearnasynyń menshikti tilshisi Bek Ábıev, «Astana» telearnasynyń menshikti tilshileri Aızada Tórebek, Bahrom Talıbjanov, «Qazaqparat» Halyqaralyq aqparat agenttiginiń menshikti tilshisi Aınur Aqbaeva, «Ońtústik» telearnasynyń dırektory Ýálı Qydyr, «Otyrar» telearnasynyń dırektory Áıgerim Jumaǵulova, «NarTV» telearnasynyń bas redaktory Ardaq Jaqsylyqova jáne «Habar» telearnasynyń beıneoperatory Nurmahan Musatov bar.
«Sizdi Qazaqstan Respýblıkasynyń buqaralyq aqparat quraldary qyzmetkerleri kúnimen shyn júrekten quttyqtaımyn! Sizge kásibı sheberligińiz ben M. Áýezov atyndaǵy Ońtústik Qazaqstan memlekettik ýnıversıtetiniń qyzmetin jan-jaqty nasıhattaýdaǵy aqparattyq qoldaýyńyz úshin alǵysymdy bildiremin. Bizdiń yntymaqtastyǵymyz aldaǵy ýaqytta da ózara tıimdi qarym-qatynasta bolatynyna kámil senimdimin. Sizge jańa shyǵarmashylyq jobalardy iske asyrýda shalqar shabytyńyzdyń arta túsýine tilektespin. Sizge jáne Sizdiń týǵan-týystaryńyzǵa zor densaýlyq, baıandy baq-bereke tileımin» delingen «Alǵys hatta».