Shaıbaly hokkeıden Qazaqstannyń ulttyq qurama komandasy Ońtústik Koreıaǵa qarsy ótkizgen úshinshi joldastyq kezdesýde aıqyn jeńiske qol jetkizdi.
Aıtýly básekede jerlesterimiz qarsylastaryna bas kótertken joq. Birinshi kezeńde koreıalyqtardyń qaqpasyna jaýapsyz tórt shaıba saldyq. Bul goldardyń avtorlary – Kırıll Baldın (7-mınýt), Artem Ignatenko (8-mınýt), Sergeı Banashkov (14-mınýt) jáne Danııar Ǵabdýllın (18-mınýt). Odan keıin Nıkıta Karpasov (35-mınýt), Maqsat Ybyraev (39-mınýt) jáne Pavel Jılın (45-mınýt) nysanan dál kózdedi. Qarsy jaq bir ǵana gol soǵýǵa jarady. Qorytyndy esep – 7:1.
Esterińizge sala keteıik, qos komanda arasyndaǵy alǵashqy eki match Ońtústik Koreıa quramasynyń paıdasyna sheshilgen edi. Bul kezdesýlerde 4:5 jáne 4:7 esepteri tirkeldi. Aldaǵy ýaqytta olar taǵy eki ret ózara kúsh synasady.