Sol úıden páterli bolǵan jas mamandar Lázzat О́sken men Erbolat Dúısenbaev aýdanǵa kelgende aldynan jańa baspana daıyn turady dep oılamapty.
– Biz О́.Sultanǵazın atyndaǵy Qostanaı memlekettik pedagogıkalyq ýnıversıtetine «Serpin» baǵdarlamasy boıynsha Shymkent qalasynan kelip túsken edik. Tórt jyl oqyp, matematıka pániniń muǵalimi mamandyǵyn aldyq. Endi óz qalaýymyzben Amangeldi aýdanyna keldik. Aldymyzdan jap-jańa baspana daıyn tur eken, qatty qýandyq. Bir bólme bolǵanmen ishi keń, ystyq sý, sýyq sýy aǵyp tur, ortalyqtan jylytylady, qysta ot jaqpaımyz, – deıdi Lázzat О́sken. Aıtpaqshy, Lázzat pen Erbolat bul baspanaǵa tamyz aıynda jas otbasy bolyp oralady, oǵan deıin Shymkentke ata-analaryna baryp, úılený toıyn ótkizip keledi eken. Jas mamandar úshin jastyqtyń qýanyshy osylaı jalǵasyn tappaq.
Jasyratyny joq, búginde oblys ortalyǵynan shalǵaı jatqan Amangeldi aýdanynda mamandar tapshylyǵy qatty bilinedi. Aýdan boıynsha 8 pánnen 23 muǵalim jetispeıdi. Al jalpy, dáriger, veterınar sekildi basqa mamandyqtardy qosqanda aýdanǵa áli 40-tan asa maman kerek. Bir bıýdjettiń jelkesine mine bermeı, jumyla kirispese joq tabyla ma? Jas mamandarǵa arnalǵan 8 páterli úıdi aýdan kásipkerleri jumylyp, nebári 2 aıdyń ishinde salyp berdi.
Jastar jylyna oraılastyrylyp salynǵan jas mamandarǵa arnalǵan úı men Jastar saıabaǵyna 47 mıllıon teńge demeýshiler qarajaty tartyldy, sonymen qatar 15 mıllıon teńge bıýdjet qarajaty jumsaldy. Aýdanda «Rýhanı jańǵyrý» baǵdarlamasynyń «Týǵan jer» arnaıy jobasy aıasynda ıgi jumystar qolǵa alynǵan. «Mektepke taǵzym» aksııasymen mektep túlekteriniń aýyl mektepterine qolǵabysy uıymdastyryldy. Amangeldi orta mektebiniń túlegi Ábilhan Boranbaev 2,5 mıllıon teńgege IT kabınet alyp berse, Y.Altynsarın atyndaǵy orta mekteptiń túlekteri 1 mln teńgege geografııa alańynyń jabdyǵyn ákelip berdi. Aýdanda mundaı mysaldar jetkilikti. Aqsaı aýylyndaǵy Búırektal orta mektebiniń túlegi Aleksandr Pavlovskıı mektepke 900 myń teńgege kómek kórsetti. Amantoǵaı orta mektebiniń túlekteri jáne jeke kásip ıeleri О́mirzaq, Dúısen Ilııasovtar, Darhan Shakymanov syndy azamattar mekteptiń jóndeý jumystaryna 6 mıllıonnan astam teńge qarjylaı kómek kórsetti. Úrpek aýylyndaǵy Jańaýyl orta mektebiniń ár jyldardaǵy túlekteri bilim uıasy men aýyldy abattandyrý maqsatynda «Úlesim saǵan, Úrpegim!» atty qor ashyp, 12 mıllıon teńgege jýyq qarajat jınady. Osylaısha aýdannyń mektep túlekteri bıyl óz aýyly men mektebine 45 mıllıon teńgeniń demeýshilik kómegin kórsetken.
Aýdan ortalyǵyndaǵy buryn shańy shyǵyp bos jatqan jerde Jastar saıabaǵy ornady. Jobanyń quny 30 mıllıon teńgeni qurady.
– Bul aýdan úshin az qarjy emes, saıabaqtyń salynýy aýdandaǵy kásipkerlerdiń arqasy. Endi jas kásipkerler osy saıabaq ishinen óz bıznesin ashqaly otyr. Munda pıssa, doner, káýap ortalyqtary, sýsyndar jáne qymyz satatyn oryndar jáne balalarǵa arnalǵan oıyn alańdary jumys isteıtin bolady. Saıabaq aýdan
turǵyndarynyń mádenı-demalys orny bolýmen qatar, on shaqty adamdy jumyspen qamtıdy. Jastardyń sportpen, deneshynyqtyrýmen aınalysýyna da múmkindik jasalǵan.
Qazaqstannyń Tuńǵysh Prezıdenti Nursultan Nazarbaevtyń «Qazaqstan halqynyń kem degende 30 paıyzy sportpen shuǵyldanýy kerek» degen tapsyrmasy aýdanda kóp jumysqa muryndyq boldy. Ásirese sportqa balalar men jastardyń qamtylýy aıryqsha nazarda. Aýdan ortalyǵyndaǵy B.Qoldasbaev atyndaǵy mektepte zamanaýı shaǵyn fýtbol alańynyń ashylýy sonyń jarqyn mysaly, – deıdi aýdan ákimi Ámirhan Asanov. Ony B.Qoldasbaev atyndaǵy qazaq orta mektebiniń túlegi, kásipker Serik Qapapın óziniń 12 mıllıon teńge qarjysyna salyp berdi.
Amangeldi aýdanyndaǵy osyndaı áleýmettik nysandardyń kóbeıýi aýyl sharýashylyǵynyń da, aýyldyń da nyǵaıyp eńse kóterip kele jatqanyna dálel. Sońǵy jyldary mal ósirý úshin jastardyń aýylǵa kele bastaǵanyna da jaqsy mysaldar bar. Jas mamandar da jyl qusyndaı aýylǵa qaıtsa, týǵan jerdi gúldendiretin de solar bolady.
Qostanaı oblysy,
Amangeldi aýdany