Muhammad Alı Djınna – Pákistannyń irgetasyn qalaýshy jáne birinshi general-gýbernator – ult Ákesi retinde qurmetteledi, brıtandyq Úndistannyń bólinýin jaqtaǵan eń belsendi qatysýshylardyń biri, asa iri musylman saıası qaıratkeri.
Ortalyqtyń ashylý saltanatynda sóz alǵan QazUÝ rektory, akademık Ǵalym Mutanov Qazaqstan Respýblıkasy men Pákistan Islam Respýblıkasyn kóp jylǵy dostyq qarym-qatynastar baılanystyryp, Qazaqstan táýelsizdik alǵannan keıin jańa serpin alǵandyǵyn atap ótti. Pákistan Qazaqstannyń táýelsizdigin moıyndaǵan alǵashqy memleketterdiń biri boldy.
Ol óz ýaqytynda úndi musylmandary úshin jeke memleket qurýǵa shaqyrǵan Muhammad Álı Djınnanyń ortalyǵy biregeı ári eki el arasyndaǵy dostyq qarym-qatynasty nyǵaıtýǵa yqpal etetinine senim bildirdi.
«1992 jyldyń 24 aqpanynda Qazaqstan Respýblıkasynyń Tuńǵysh Prezıdenti Nursultan Nazarbaevtyń Pákistan Islam Respýblıkasyna resmı sapary kezinde dıplomatııalyq jáne konsýldyq qatynastar ornatyldy. Bul mańyzdy qadam QazUÝ-da shyǵystaný fakýltetinde ýrdý bólimshesiniń ashylýyna yqpal etti. Sol ýaqyttan bastap shyǵystaný fakýltetinde ýrdý tilin biletin 50-den astam maman daıarlandy. Qazirgi tańda fakýltette ýrdý tili men ádebıeti boıynsha 10-nan astam stýdent bilim alyp jatyr», – dedi QazUÝ rektory Ǵalym Mutanov.
Qazirgi tańda ýnıversıtet fakýltetteriniń ǵylymı mekemelermen jáne Pákistannyń belgili ǵylym qaıratkerlerimen yntymaqtyǵy jolǵa qoıylǵan. Máselen, ótken jyly QazUÝ-ǵa Qarashı ýnıversıtetiniń Halyqaralyq hımııa jáne bıologııa ǵylymdary ortalyǵynyń dırektory, professor Muhammad Ikbal Chaýdharı, ǵalym Ahmad Han Ashık ǵylymı-ınnovasııalyq zertteýlerdi júrgizýde óz tájirıbelerimen bólisip, ýnıversıtettiń qurmetti qonaǵy boldy.
QazUÝ men Karachı ýnıversıtetiniń Halyqaralyq hımııa jáne bıologııa ǵylymdary ortalyǵynyń birlesken jobasy – ınnovasııalyq zertteýlerdiń ǵylymı zerthanasy – Ońtústik COMSATS elderiniń turaqty damýyna arnalǵan Ǵylym jáne tehnıka jónindegi komıssııanyń kómegimen júzege asyryldy. Ortalyq tıimdi fıtopreparattardy óndirýge baǵyttalǵan irgeli zertteýler júrgizedi.
Sondaı-aq QazUÝ-dyń úsh magıstranty Qarashı qalasyndaǵy Halyqaralyq ortalyqta ǵylymı-zertteý taǵylymdamasynan ótse, bıologııa jáne bıotehnologııa fakýltetinde bir Pákistan PhD doktoranty bilim alyp júr.
ALMATY