Fransııa tasjoldarynda velosporttan beıresmı álem chempıonaty sanalatyn «Týr de Frans» kópkúndiginiń besinshi kezeńi máresine jetti. Bul kezeńde «Astana» velokomandasynyń shabandozy Alekseı Lýsenko máre syzyǵyn 15-shi kesip, komandalastarynyń arasynda úzdik nátıje kórsetti.
Sent-De-de-Voj qalasynan bastalǵan besinshi kezeń Kolmar qalasynda aıaqtaldy. 175,5 shaqyrymǵa sozylǵan qashyqtyqty birinshi bolyp Bora-hansgrohe ókili Peter Sagan tórt saǵat, eki mınýtta júrip ótti. Ekinshi oryndy Výt Van Aert (Team Jumbo) ıelensi, úzdik úshtikti Matteo Trentın (Mitchelton-Scott) qorytyndylady.
Besinshi kezeńnen keıin Jýlıan Alafılıpp áli de top bastap keledi. «Astana» velokomandasynyń sapynan Alekseı Lýsenko jalpy esepte 22-orynda tur. Ol Alafılıppten bir mınýt, alty sekýnd qalyp qoıǵan. Dál sondaı kórsetkishpen Iаkob Fýlsang 25, Lýıs Leon Sanches 26 jáne Pelo Bılbao 27-orynda keledi.