Byltyr Qostanaıdaǵy «AgromashHoldıng KZ» zaýyty men «John Deere» kompanııasy quny 2,5 mlrd dollarǵa baǵalanǵan strategııalyq seriktestik týraly kelisimge kelgen. Shart boıynsha Qostanaıda 5 jyl ishinde kem degende 3 myń «John Deere» qurastyrylyp, el kóleminde 3 servıs ortalyǵy ashylady. Sondaı-aq mamandardy oqytý júıesi qolǵa alynady.
Egin jınaýda «John Deere» kombaınyna teń keler tehnıka az. Byltyrdyń ózinde Qostanaıdaǵy Lokalızasııa zaýytynda 300-den astam «John Deere» qurastyryldy. Kúzgi naýqanǵa taptyrmaıtyn qýatty tehnıkanyń Qostanaıda shyǵa bastaǵany sharýalardy da qýantyp otyr.
Atalǵan kelisimshart aıasynda «AgromashHoldıng KZ» kompanııasynyń ınjenerleri men jas mamandary AQSh-qa baryp, óndiristik taǵylymdamadan ótip keldi. Sapar barysynda mamandar «John Deere» kompanııasyna qarasty birneshe zaýytta bolyp, hımııalyq dári shashatyn tehnıka, traktor, kombaın jasaý óndirisimen tanysqan.
«Otyz jylǵa jýyq óndiris salasynda eńbek etemin. Shetelge birinshi ret shyǵyp turmyn. Ol jaqtaǵy óndiris oryndaryn aralap, shırek ǵasyrdan keıin ózimdi qaıtadan stýdent retinde sezindim. Boıymda jumysyma degen jańasha qulshynys paıda boldy. Amerıka qatty tańǵaldyrdy. Ásirese aýyl sharýashylyǵy salasy erekshe damyǵan. О́ńdelmegen birde-bir jer joq, barlyq jerde tártip bar. Al zaýyttar tolyq sıfrlandyrylǵan, avtomattandyrylǵan júıede jumys istep tur», deıdi ınjener Qaırat Káribaev.
«Agromash» zaýytynyń óndiristik dırektory Bahtııar Balǵojın «John Deere» kásiporyndaryndaǵy tehnologııa qýaty men ınjenerlik mádenıet jóninde aıtyp berdi.
«Zaýyt jumysshylary óz eli men jumysy týraly maqtanyshpen aıtady eken. Ol jaqta óndiriste aǵa býyn mamandary kóp, al jastar jaǵy azdaý. Ásirese daıyndaý ýchaskeleri ǵajap, barlyq úderis tolyq avtomattandyrylǵan. Áıgili kompanııaǵa qarasty kásiporyndarmen jan-jaqty tanysyp, óndiris barysyn meńgerip qaıttyq. Mundaı tájirıbeni qujattan nemese beınejazbadan alý múmkin emes. Endi ózimiz kórip-bilip, úırenip kelgen jańa tásilderdi óndiriske engizýdi kózdep otyrmyz», dedi B.Balǵojın.
Kompanııa basshysynyń aıtýynsha, zamanaýı óndiristiń negizgi qozǵaýshy kúshi – ınjener mamandar. Sondyqtan taǵylymdama aıasynda alynǵan bilim men tájirıbe óndiris úderisiniń mazmunyn jańartady, al jeke mamandardyń belsendiligi jalpy óndiris júıesiniń damýyna yqpal etedi.
«Biz ónerkásipti sózben emes, naqty quzyretter arqyly damytamyz. Búginge deıin 530-dan astam tehnıka shyǵardyq. «John Deere» zaýyttaryndaǵy oqý-tájirıbe bizge asa mańyzdy. Ol jaqta oqyp kelgen mamandar óz tájirıbesin bólisip jatyr. Zaýytta kelesheginen zor úmit kúttiretin jas ınjenerler kóp. Tarıhty jastar jasaıdy. Sondyqtan álem bizdiń ınjenerlerdi tanysyn, al biz álemdi tanıyq degen qaǵıdany ustanyp kelemiz», deıdi «Agromash» zaýytynyń prezıdenti Dınara Shúkijanova.
«Agromash» ujymymen birge taǵylymdamadan ótip kelgen «Eurasia Group AG» kompanııasynyń bas operasııalyq dırektory Sergeı Glok Qostanaı ınjenerleriniń AQSh-qa saparyn otandyq mashına jasaý salasyna salynǵan strategııalyq ınvestısııa retinde baǵalady.
«Mashına jasaý salasy tájirıbe jınaqtaý arqyly ǵana damymaıdy. Salanyń jetkilikti túrde damýyna sıfrlyq tehnologııalar, júıeli bilim transferi, jasandy ıntellekt negizinde qabyldanatyn tıimdi sheshimder qajet. Aldaǵy ýaqytta tehnıka, aqparat jáne agronomııa dep atalatyn mańyzdy úsh salanyń sınergııasy otandyq agrobıznesti ilgeri damytatyn negizgi faktorǵa aınalady. Ikemdi, dál ári tıimdi bul úsh qural mashına jasaýdyń jańa modelin qalyptastyrady. Bizge tehnologııalardy engizý emes, olardy jergilikti jaǵdaıǵa beıimdeı otyryp damytý mańyzdy. Sapar barysynda bizdiń ınjenerler «John Deere» óndirisine tereńirek boılap, sol jaqtaǵy mamandarmen elimizdiń tabıǵı-klımattyq jaǵdaıyna barynsha sáıkes keletin tehnıka jasap shyǵarý jóninde keńesti», dedi ol.
Búginde qos tarap Qostanaıdaǵy óndiris kólemin 3000 tehnıkaǵa deıin ulǵaıtý, qosalqy bólshekterdi shyǵarý, ony jetkizý máselesin retteýdi kózdep otyr. Sondaı-aq tehnologııalyq ınfraqurylymdy damytý, jańa jumys oryndaryn qurý, óndiristiń jergilikti úlesin eseleý josparda bar.
Munyń syrtynda, ınjener kadrlardy daıarlaý maqsatynda jergilikti mamandarǵa arnalǵan turaqty bilim baǵdarlamasy iske qosylady. Baǵdarlama aıasynda AQSh pen Eýropadaǵy «John Deere» zaýyttarynda taǵylymdama uıymdastyrylyp, mashına jasaý, avtomattandyrý jáne sıfrlyq jobalaý boıynsha zamanaýı tehnologııalardy meńgerý qarastyrylǵan. Sonymen qatar aldaǵy ýaqytta Qostanaıda sıfrlyq ınjener, avtonomdy tehnıka operatory, jasandy ıntellekt jáne derekterdi óńdeý mamany, sıfrlyq agronom tárizdi jańa ınjenerlik quzyretterdi damytýǵa arnalǵan bilim ortalyǵy ashylmaq.
Qostanaı oblysy