Mártók aýdany Rodnıkovka aýylynda «Egistik kúni» aýylsharýashylyq tehnıkalyrynyń kórmesi ótti. Jáne aýylsharýashylyǵyna qatysty mańyzdy máselelerdi talqylaýǵa arnalǵan semınar uıymdastyryldy. Agronomdardyń aýqymdy basqosýyna oblys ákimi Ońdasyn Orazalın arnaıy qatysyp, aýylsharýashylyq salasyndaǵy jańartylǵan tehnıkalarmen tanysty. Sondaı-aq dástúrli túrde ótetin sharaǵa jergilikti 160-tan astam sharýa qojalyq basshylary men Batys, Soltústik Qazaqstan, Qostanaı oblystarynan kelgen mamandar da boldy. Kelgen qonaqtar bıyl «Rodnıkı Agro», «Bordo Indastrıs», «Týrkýaz Mashenerı». Evrazııa grýp», tb sharýa qojalyqtarynyń aýylsharýashylyq tehnıkalaryn tamashalady. Máselen, «Rodnıkı Agro» JShS dıhandary jaqynda ǵana 1 mlrd 300 mln teńgege traktor, kombaın, sońǵy úlgidegi ozyq tehnıkalardy satyp alǵan. «Egistik kúniniń» maqsaty Aqtóbe óńiriniń aýylsharýashylyq salasyndaǵy sıfrlandyrý júıesin kórsetý, ózge óńirdiń mamandarymen tájirıbe almasý bolyp tabylady. Bıyl oblysta 786 myń ga jerge ár-túrli maıly daqyl, dándi-daqyl, kókónis, jemis-jıdek egilgen. Bul ótken jylmen salystyrǵanda 8 % artyq. Sonymen qatar Aqtóbe oblysynyń egin sharýashylyǵyna 4,4 mlrd teńge qarjy bólingen. Sonyń ishinde 800 mln-ǵa jýyq qarajat sýbsıdııaǵa arnalǵan. Bul - sharýalardyń kásibin damytýǵa jasalǵan úlken múmkindik.
Tehnıkalyq kórmeden soń, mamandardyń bas qosýymen semınar ótti. Semınarǵa qatysýshylar Aqtóbe óńirindegi egin salasyn odan ári damytý joldaryn talqylap, pikirlerin bildirdi.
Jıyn sońynda Ońdasyn Orazalın aýylsharýashylyq basqarmasynyń basshysy Qusaıyn Sársenbaevqa saladaǵy eski tehnıkalardan arylyp, aldaǵy ýaqytta jańalaýdy, sońǵy úlgidegi tehnıkalardy engizip, eńbek ónimdiligin arttyrýdy tapsyrdy.