Kórmege Qazaqstan Respýblıkasynyń sımvoly sanalatyn «Altyn adam» qoıyldy. Kórmeniń maqsaty – Qazaqstannyń tarıhı-mádenı baı murasymen sheteldik kórermendi tanystyrý.
Soltústik Makedonııanyń Ulttyq arheologııalyq mýzeıindegi kórmeden kıimi altyn japsyrmaly jáne jebe, qar barysy, arqar, jylqy jáne qus túrindegi altyn tilimsheler áshekeılep turǵan konýs pishindi erekshe bas kıimdi Altyn adamnyń rekonstrýksııasyn jáne osy jas aq súıek saq jaýyngerimen (arheologtardyń pikirleri boıynsha 17-18 jastar shamasynda) birge jerlengen erte temir ǵasyrynyń (b.d.d V-IV ǵǵ.) arheologııalyq oljalarynyń kolleksııasyn tamashalaýǵa múmkindik bar.
Kórmege Qazaqstan Respýblıkasy Ulttyq mýzeıiniń qorlarynan barlyǵy 292 zat usynyldy. Kórmege usynylǵan Qazaqstannyń ejelgi jáne ortaǵasyrlyq óneriniń jaýharlary – bul Eýrazııa dala mádenıeti murasynyń ózindik ereksheligin kórsetetin burynǵynyń ataýsyz sheberleri týyndylarynyń az ǵana bóligi.
Kórmeniń saltanatty ashylý rásimine Soltústik Makedonııa Respýblıkasynyń Mádenıet mınıstri Hysnı Ismaıl (Hysni Ismaili), QR Ulttyq mýzeıi dırektorynyń orynbasary Almaz Nurazhan, Soltústik Makedonııa Respýblıkasynyń Ulttyq arheologııalyq mýzeıiniń dırektory Goran Sanev qatysty. Olar biregeı kórme jobasy arqyly Qazaqstannyń tarıhı-mádenı murasymen, ejelgi jáne ortaǵasyrlyq óner týyndylarymen tanysýlaryna múmkindik alǵandary úshin qazaqstandyqtarǵa alǵys bildirdi. Sonymen qatar, qos memlekettiń ókilderi Makedonııa men Qazaqstannyń tarıhy, ózara uqsastyǵy men ortaq kózqarastary týraly keńirek aıtyp, bolashaqta mádenı baılanysty arttyrýǵa senim bildirdi.
1960-jyldardyń sońy men 1970-jyldardyń basynda Almatynyń mańaıynda tanymal arheolog Kemal Aqyshev zerttep júrgen Esik qorǵanynan, keıin Qazaqstannyń sımvolyna aınalǵan, saq patshasy – «Altyn adamnyń» súıegi tabylǵan arheologııalyq sensasııa oryn aldy. Baǵa jetpes oljaǵa «Qazaq Týtanhamony» degen at berilip, «ǵasyr jańalyǵy» dep tanyldy. Ejelgi dala bıleýshisiniń tájindegi qanatty altyn pyraq áshekeıleri Qazaqstan Respýblıkasy Eltańbasynyń bólshegine aınaldy, al Altyn adamnyń músini Almatydaǵy Táýelsizdik alańyna ornatyldy.
Jarty ǵasyrǵa jýyq ýaqyt ótkennen keıin Qazaqstan Respýblıkasy Ulttyq mýzeıi halyqaralyq «Altyn adamnyń álem mýzeılerine sherýi» jobasyn jarııalady. Aýqymdy shara sheńberinde Belarýs, Reseı, Ázerbaıjan, Qytaı, Polsha jáne Ońtústik Koreıa, О́zbekstan mýzeılerinde kórmeler úlken jetistikpen ótken bolatyn.