Beısenbi, 11 sáýir 2013 2:00
Atymtaı jomart syndy aqkóńil azamat, belgili kásipker Bolat Nazarbaev Qordaı aýylynyń soltústik-batys jaǵyndaǵy 12 gektar aýmaqqa eki otbasylyq, 70 kottedjden turatyn qalashyq salý úshin óńir ekonomıkasyna qomaqty ınvestısııa saldy.
Beısenbi, 11 sáýir 2013 2:00
Atymtaı jomart syndy aqkóńil azamat, belgili kásipker Bolat Nazarbaev Qordaı aýylynyń soltústik-batys jaǵyndaǵy 12 gektar aýmaqqa eki otbasylyq, 70 kottedjden turatyn qalashyq salý úshin óńir ekonomıkasyna qomaqty ınvestısııa saldy.
Búginde bolashaq qalashyq qurylysshylardyń qaınaǵan jumys alańyna aınalǵan. Beton quıýshylar alǵashqy 3 kottedj qurylysynyń irgetasyn quıyp bitirip, kirpish qalaý jumystaryna kirisip te ketipti. El ıgiligi jolyndaǵy ımandy bastamanyń ıesi Bolat Nazarbaev sol irgetastyń birine alǵashqy kirpishti óz qolymen qalap, qurylysshylardyń jumysyna tabys tiledi.
– Bizge jaryq dúnıe syılaǵan Áljan anamyz Qordaı aýdanyndaǵy Qasyq aýylynyń qyzy. Sondyqtan asyl anamyzdyń kindik qany tamǵan óńir bizge de óte ystyq. Endeshe, altyn anamyzdyń atyn máńgi este qaldyrý úshin osy bir jaýapty da óte úlken jobaǵa táýekel ettim. Aýdanda 5500 otbasy turǵyn úı kezeginde tur eken. Bolashaqta «Áljan apa» atyndaǵy qalashyqta osy kezekte turǵandardyń ishindegi týǵan jerine kelip tý tikken oralmandar, shekara qyzmetkerleri, kedenshiler, memlekettik qyzmetkerler jáne basqa da jas mamandar úlesker retinde úı alyp, tatý-tátti ómir súrip, al aýlasynda balalarynyń shat-shadyman kúlkileri sańqyldap estilip jatsa, baıtaq úshin de, biz úshin odan artyq qandaı baqyt bar, – degen kásipker óz jobasynyń qyr-syryn jınalǵan jurtpen bólisken.
Kásipkerdiń aıtýyna qaraǵanda, keleshekte qalashyqtyń óz balabaqshasy, stadıony, balalarǵa arnalǵan oıyn alańdary jáne turǵyndardyń kúndelikti turmys qajetin óteıtin taǵy basqa da áleýmettik nysandary bolady. Al ár 10 kottedj bir aýlaǵa bólinedi.
«Áljan apa» qalashyǵynyń qurylys jumysyn qolǵa alǵan «Suńqar» JShS-nyń dırektory Altynbek Sadyrbaev ta óńirge belgili azamattardyń biri. Ol buǵan deıin elimizdegi jáne oblystaǵy áleýmettik mańyzy úlken kóptegen qurylys nysandaryn ýaqtysynda jáne sapaly bitirýimen tanylyp, halyq qurmetine bólengen kásipker-qurylysshy bolatyn. Onyń Taraz qalasyndaǵy Ortalyq bazardyń jańa qurylys jumysyn zaman talabyna saı tez arada salyp bitirgenine de jurt kýá. Endi, mine, ol taǵy bir úlken jobanyń tizginin ustap, ony oıdaǵydaı bitirýge shyn nıetimen kirisip otyr.
Árıne, bir-eki jyldyń bederinde bir qalashyqtyń qurylysyn salyp bitirý ońaı sharýa emes. Bul rette A.Sadyrbaev ózi basqaratyn seriktestik qurylysshylarynyń tájirıbesine, tártibine jáne jaýapkershiligine senetinin aıtqan. Aıtsa aıtqandaı, qalashyq qurylysynyń sapasyna jaýap beretin Arnur Meıirbekov óz isiniń bilgir mamany eken. Ol búginde qurylys alańyna asa qajetti alǵashqy 17 tehnıkany jedel jumyldyrsa, 60 qurylysshy jumystaryna bilek sybanyp kirisip ketken.
Jobada kórsetilip, josparda belgilengen kottedjderdiń qabyrǵasy bıyl tolyq qalanyp bitedi. Sondyqtan aldaǵy ýaqytta 60 qurylysshynyń qatary 250-300 adamǵa deıin kóbeımekshi. Sondaı-aq, qurylys mamandary men sheberlerinen basqa kóptegen jergilikti turǵyndar da qara jumysqa tartylmaqshy. Al olarǵa alańsyz jumys isteý úshin seriktestik tarapynan barlyq jaǵdaı jasalyp, jataqhanamen, ýaqytyly ystyq tamaqpen qamtamasyz etiledi.
Dáýletti adamdar buǵan deıin, ádette, týǵan aýylyna meshit, sport zal, ári ketse balabaqsha salyp berýmen shektelip kelse, belgili kásipker Bolat Nazarbaev qulashty keńge sermep, el turǵyndary úshin óz qarjysyna birinshi bolyp qalashyq salýǵa táýekel etip otyr. Mundaı bastamany basqalarǵa uıalmaı úlgi etýge bolady. О́ıtkeni, bolashaqta 140 otbasynyń altyn uıa-mekenine aınalatyn 70 kottedj salýǵa kez kelgen jomarttyń táýekel ete bermesi anyq.
Kósemáli SÁTTIBAIULY,
«Egemen Qazaqstan».
Jambyl oblysy,
Qordaı aýdany.