Juma, 24 mamyr 2013 2:06
Qostanaı oblysyna Kanadanyń Alberta provınsııasynan delegasııa keldi. Onyń quramynda Alberta úkimetiniń jáne iskerlik orta ókilderi, ıaǵnı asyl tuqymdy mal ósiretin, genetıkalyq materıal, mal sharýashylyǵy keshenderi úshin qural-jabdyq óndirýge jáne eksportqa shyǵarýǵa mamandanǵan kompanııa menedjerleri men «gereford», «angýs» asyl tuqymdy iri qara sharýashylyqtarynyń jetekshileri bar. Oblys basshylyǵy men kásipkerleri jáne kanadalyq delegasııa kezdesýinde eki jaq ta yntymaqtasa jumys isteýge daıyn ekendigin bildirdi.
Juma, 24 mamyr 2013 2:06
Qostanaı oblysyna Kanadanyń Alberta provınsııasynan delegasııa keldi. Onyń quramynda Alberta úkimetiniń jáne iskerlik orta ókilderi, ıaǵnı asyl tuqymdy mal ósiretin, genetıkalyq materıal, mal sharýashylyǵy keshenderi úshin qural-jabdyq óndirýge jáne eksportqa shyǵarýǵa mamandanǵan kompanııa menedjerleri men «gereford», «angýs» asyl tuqymdy iri qara sharýashylyqtarynyń jetekshileri bar. Oblys basshylyǵy men kásipkerleri jáne kanadalyq delegasııa kezdesýinde eki jaq ta yntymaqtasa jumys isteýge daıyn ekendigin bildirdi. Negizi aýyl sharýashylyǵy joǵary damyǵan Kanadamen Qostanaı oblysy saýda-sattyqty sonaý 90-shy jyldardyń ortasynda-aq bastap jibergen. Aýa-raıy, tabıǵaty Qazaqstannyń soltústik óńirimen tym uqsas Kanadadan bizdiń kásipkerler aýylsharýashylyq tehnıkalary men asyl tuqymdy mal satyp aldy. Qostanaılyq kásipkerler, ásirese Saskachevan provınsııasymen alys-beristi damytqan edi.
Delegasııany bastap kelgen Alberta provınsııasynyń aýyl sharýashylyǵyn jáne selolyq óńirdi damytý mınıstri Verlın Olson ózderiniń qostanaılyqtarǵa tıimdi áriptes bolatynyn aıtty. Bul provınsııanyń úshten biri damyǵan aýyl sharýashylyǵynyń úlesine tıedi. Onda 5 mıllıon bas iri qara ósiriledi. Bul búkil Kanadadaǵy iri qara sanynyń 40 paıyzy bolyp tabylady. Eldegi ettiń 70 paıyzyn osy provınsııa óndiredi. Alberta mal azyǵyn daıyndap, satýda da aldyna eshkimdi sala bermeıdi. Bul qostanaılyq kásipkerlerdiń qyzyǵýshylyǵyn týdyratynyna oblys ákimi Nuraly Sádýaqasov senim bildirdi.
– Biz Kanadanyń aýyl sharýashylyǵy saıasatyna yqpaly zor provınsııamen yntymaqtastyǵymyzdy keńeıtkimiz keledi, – dedi qonaqtarǵa Nuraly Mustafauly.
Ekijaqty kezdesýde qostanaılyq kásipkerler men sharýashylyq uıymdastyrýshylar da sóz aldy. Oblystaǵy «Agrofırma Dıev» jáne «Qaırat» О́KF» jaýapkershiligi shekteýli seriktestikteri Kanadadan ákelingen asyl tuqymdy iri qarany ósirip jáne aýylsharýashylyq tehnıkalaryn paıdalanyp otyrǵan sharýashylyqtardyń biri. «Dıev» sharýashylyǵy jergilikti Áýlıekól tuqymynyń ónimdiligin burynǵydan da arttyrý úshin Kanadadan úsh júz bastyń syrtynda «sharole» asyl tuqymdy iri qaranyń qashary men ógizshesin ákelgen bolatyn. Sharýashylyq dırektory Oleg Danılenko Kanadadan ákelingen iri qaranyń Qostanaıdyń sýyǵyna tez kóndigip ketkenin, salmaqty da jaqsy qosatynyn aıtty. Alaıda, kanadalyq sıyrlar jergilikti tuqymdasy sııaqty jaıylmaıdy, olardy qysy-jazy qorada ustap, baǵý kerek. Bul, árıne, jergilikti malǵa qaraǵanda qymbatqa túsetinin de jasyrǵan joq.
Qostanaılyq aýylsharýashylyq taýarlaryn óndirýshiler tehnıka parkin kanadalyq qýatty tehnıkalarmen jańartyp jatyr. Mysaly, Qamysty aýdanyndaǵy «Qaırat» О́KF» JShS-nyń búkil tehnıkasy Kanadadan alynǵan. Sharýashylyq jetekshisi Tóremurat О́tepov kanadalyq kásipkerlerge aýylsharýashylyq tehnıkalaryn Qostanaıda qurastyrýdy usyndy. Jalpy, sheteldik tehnıkalardyń servıstik qyzmetin jetildirý oblystaǵy aýylsharýashylyq taýarlaryn óndirýshiler úshin ózekti máseleniń biri.
Kanadalyq delegasııa oblystyń Qarabalyq jáne Qostanaı aýdandaryndaǵy sharýashylyqtardy aralady. Kezdesýde delegasııa múshesi, Alberta provınsııasyndaǵy Mal sharýashylyǵy jáne et ónerkásibi qaýymdastyǵynyń tóraǵasy Deıv Chalak aıtqandaı, ekonomıkalyq baılanys myqty bolýy úshin eki jaq ta oblys aýyl sharýashylyǵynyń qajetin bilýi tıis. Innovasııalyq-ınvestısııalyq jobalardy júzege asyryp jatqan Qostanaı oblysyndaǵy aýyl sharýashylyǵy kásipkerleriniń kanadalyq áriptesterden úıreneri de, alary da bar. Muny qarym-qatynas jıileı kele ýaqyt ta kórsetedi.
Názıra JÁRIMBETOVA,
«Egemen Qazaqstan».
QOSTANAI.