Turqy esik pen tórdeı shabdar at mingen, dembelshe kelgen jas jigit taqymyna qysqan serkeden aıyrylar emes. Tus-tustan antalaı qaýmalaǵan, serkege qolyn sozǵan kókparshylar qapysyn taba almaı júr. Shamasy shabdar at kókparǵa túsip ysylǵan júırik bolar, qarsy kelgenin omyraýymen soǵyp mańaılatar emes. Qos qulaǵyn jymyryp alǵan jaryqtyq artynan umtylǵan bir-eki kókparshyny ońdyrmaı oqsata teýip te jiberdi. Álden ýaqytta bitimi bólek qarager atty kóldeneńdeı salǵan. Jan alyp, jan berisken, qym qýyt arpalystyń ishinde taqymy bostaý boldy ma eken, qaragerdiń ústindegi bozbala at artyna syrǵyp túskeni. О́ldi dep shý ete qaldy, kókpardy tamashalap otyrǵan júz san jamaǵat. О́lmese de mertigetin boldy, dedi bireýler, qaptaǵan tuıaqtyń bireýi qaqyrata tıse, opyryp jibermeı me?
Boz dalanyń bozamyq topyraǵynan ushqan shań torǵyn shymyldyq ispetti, túk kórseter emes. Serkeden basqany kóre almaı arýaqtanyp at jalynda alasurǵan tamam kókparshy siltideı tyndy. Olar da japyrylyp attan túse bastaǵan. Tozań sál seıilgen soń ǵana kórdik, aman eken. Shylbyryn súıretken qarager atyna qaraı jan ushyryp júgirip barady. Demin ishine tartyp otyrǵan jurt ıyqtarynan júk túskendeı, ýh dep bir dem aldy.
– Qazaqta «Sıyr múıizin tóseıdi, jylqy jalyn tóseıdi» degen sóz bar, dedi bir aqsaqal. Qandaı qysyltaıań jer bolsa da jylqy balasy adamdy baspaıdy.
Qambar atanyń bir qasıeti bálkim osy shyǵar.