Sońǵy ýaqytta derbes qurylǵylarda qaýipsizdik sertıfıkatyn paıdalaný tártibi týraly aqparat belsendi taralýda. Bul týraly Bas prokýratýranyń baspasóz qyzmeti habarlady.
Sıfrlyq damý, sondaı-aq aqparat jáne qoǵamdyq damý mınıstrlikteri ýákiletti memlekettik organdar retinde atalǵan sertıfıkattyń nysanaly maqsatyn túsindirdi.
Onyń eń aldymen quqyqqa qaıshy kontentten (terrorızmge, ekstremızmge, sýısıdke shaqyrý, zorlyq-zombylyqty, qatygezdikti, pornografııany nasıhattaý jáne t.b.) qorǵaý ekenine nazar aýdaryldy.
Budan basqa, sertıfıkattyń elektrondyq qurylǵylardy «buzýdan», kıbershabýyldar men vırýstardan qorǵaıtyny atalyp ótildi.
Sonymen qatar, qoǵamda ony ornatý qajettiligi, júrgizilýi múmkin «ańdýlar» jáne t.b. týraly pikirtalastar tyıylmaı otyr.
Bas prokýratýra jeke ómirge qolsuǵylmaýshylyqqa, jeke basy men otbasy qupııasyna, hat almasýǵa, telefon arqyly sóılesýge, habarlarǵa konstıtýsııalyq quqyqtardyń saqtalatynyna memleket kepildik beretinine nazar aýdarady.
Olardy buzý qylmystyq jaýapkershilikke deıingi jaýaptylyqqa alyp keledi.
Atap aıtqanda, elektrondyq aqparattyq resýrstarǵa, aqparattyq júıege zańsyz kirý nemese telekommýnıkasııalar jelisi boıynsha beriletin aqparatty zańsyz ustap qalý úshin qylmystyq jaýaptylyq bolady jáne bes jylǵa deıin bas bostandyǵynan aıyrý kózdelgen (Qylmystyq kodekstiń 147-babynyń 3-bóligi).
QK 148-babynda hat jazysý, telefonmen sóılesý, poshta, telegraf habarlary nemese ózge de habarlar qupııasyn zańsyz buzǵany úshin jaýaptylyq belgilengen.
Prokýratýra organdary qadaǵalaý qyzmeti sheńberinde basqa memlekettik organdarmen birge mundaı quqyq buzýshylyqtardyń jolyn kesip, kinálilerge tıisti sharalar qabyldaıtyn bolady.