Almaty ákimdiginde qala ákimi Baqytjan Saǵyntaevtyń tóraǵalyq etýimen keńes ótip, onda qoǵamdyq kólikti damytý jáne jol-kólik ınfraqurylymy máseleleri qaraldy, dep habarlaıdy shahardyń baspasóz qyzmeti.
Kún tártibinde birinshi kezekte jyljymaly quramdaǵy avtobýs parkin jańartý qaralǵan. Kún saıyn qala turǵyndary jumys kúnderi 1 ,2 mıllıonnan astam ret (demalys kúnderi 800 myń) qoǵamdyq kólikterge otyrady eken. Birinshi jartyjyldyqta 180 mıllıonnan astam jolaýshy tasymaldanǵan. Bul ótken jyldyń osy kezeńimen salystyrǵanda 20% -ǵa kóp.
Halyqqa qyzmet kórsetý úshin kún saıyn jol jelisine qoǵamdyq kóliktiń 1622 birligi shyǵady. Avtobýs parki 80%-ǵa jańarǵan. Bıylǵy jyly avtobýs parkin tolyqtaı jańartý josparlanǵan.
Qala ákimi eńbek naryǵynyń suranysyn eskere otyryp, avtoparkter úshin kadrlar daıarlaý jumysyn júıeli jáne turaqty júrgizýge aıryqsha nazar aýdardy. Kolledjder bazalary negizinde júrgizýshiler, slesarlar, mehanıkter daıyndaý qajet. Basty maqsat – servıs deńgeıin kóterý.
Keńeste qala syrtyna qatynaıtyn jolaýshylar tasymalyn damytý, trolleıbýs jelilerin modernızasııalaý da keńinen sóz boldy. Jyl aıaǵyna deıin Tımırıazev kóshesi boıynda uzyndyǵy 5,1 shaqyrym bolatyn sym jelisi aýystyrylady. Trolleıbýsqa qatysty barlyq sym jelileri men transformatorly qosalqy stansalar jóndeledi, trolleıbýs parki jańarady.
Jıyn barysynda jol men jolaıryqtaryn, baǵdarshamdar nysandaryn salýdyń barysy qaraldy.
«Bul sharalardyń basty maqsaty – qalalyqtarǵa sapaly kólik qyzmetin kórsetý jáne jolaýshy tasymalynyń qaýipsizdigin qamtamasyz etý», deıdi qala ákimi.
ALMATY