Oblysta «Mektepke jol» respýblıkalyq aksııasy jalǵasýda. Sharany uıymdastyrýshylar – oblystyq bilim basqarmasy men óńirlik Kásipkerler Palatasy. Búgingi tańda járdemge muqtaj jandardyń tizimi anyqtaldy. Aksııa aıasynda 11 myńnan astam ul-qyzdy mektepke daıyndaý josparlanyp otyr. Atalmysh shara jyl sońyna deıin jalǵaspaq.
«Mektepke jol» dástúrli respýblıkalyq aksııasy aǵymdaǵy jyly oblys boıynsha 1 shildede bastaldy. Bıylǵy jyly "Júrekten-júrekke" uranymen ótkizilýde. Oblys boıynsha 11 myńnan astam oqýshyny jańa oqý jylyna daıyndaý kózdelip otyr. Osy maqsatqa «Oqýmen jappaı qamtý» qorynan 25 mıllıon teńge bólingen. Mundaı sharanyń sharapatyn az qamtylǵan jáne kóp balaly otbasylardan shyqqan oqýshylar, sondaı-aq jetim balalar men ata-anasynyń qamqorlyǵynsyz qalǵan balalar kóretin bolady.
– Oblys ortalyǵyndaǵy osyndaı otbasylardyń balalaryna búgingi kúni 11 mıllıon teńge jumsaldy. 2 mıllıon teńge demeýshilerdiń qarajaty. Al qalǵan 9 mıllıon teńge «Oqýmen jappaı qamtý» qorynan alynǵan. Barlyǵy alty júz oqýshyǵa, onyń ishinde 200-i birinshi synyp oqýshylaryna qajetti keńse zattary bar sómkeler tabystaldy,–deıdi Kókshetaý qalalyq bilim bóliminiń bas mamany Aınur Júsipova.
Gúlmıra Nurseıitova tórt balanyń anasy. Densaýlyǵyna baılanysty búgingi kúni jumys isteı almaıdy. Al úsh birdeı balany jańa oqý jylyna daıyndaýǵa qaýqarsyz. Sondyqtan, atalmysh aksııa aıasynda kópbalaly anaǵa der kezinde kómek kórsetilip otyr.
– Qoldaý kórsetip jatqandaryńyz úshin úlken alǵys bildiremin. Men 4 balanyń anasymyn. Balalarymdy jalǵyz ósirip, tárbıeleýdemin. Balalarym mektepte tegin tamaqtanady. Demeýshiler árqashan keńse zattarymen, kıimdermen kómektesip turady. Sondaı-aq jazǵy saýyqtyrý lagerlerine demalýǵa baryp turady,–deıdi kópbalaly ana Gúlmıra Nurseıitova.
Bıylǵy aksııanyń ereksheligi uıymdastyrýshylar quramyna "Atameken" ulttyq kásipkerler palatasy da enip otyr. Kómek kórsetýge ynta bildirgen kásipkerler sany da artyp keledi. Atymtaı jomarttar balǵyndardyń alańsyz bilim alýyna barynsha jaǵdaı jasaýǵa talpynýda. Kóńil marqaıady.