Mysyr Ishki ister mınıstrligi Kaır qalasynda bolǵan lańkestik áreketter «Musylman baýyrlar» terrorıstik tobyna (Qazaqstanda tyıym salynǵan) qarasty «Hasam» qozǵalysynyń áreketi degen boljam jasap otyr.
Dúısenbi kúni el astanasynyń Manıal aýdanynda jol boıynda ornalasqan Ulttyq onkologııa ınstıtýty janynda bolǵan jarylystan 20 adam qaza taýyp, 47 adam jaralanǵan edi.
Bul oqıǵaǵa baılanysty Qazaqstan Prezıdenti Qasym-Jomart Toqaev Mysyr Arab Respýblıkasynyń Prezıdenti Ábdel Fattah As-Sısıge kóńil aıtý jedelhatyn joldap, Qazaqstan halqynyń jáne jeke óziniń atynan Mysyr astanasy Kaır qalasynda bolǵan lańkestik áreketterdiń saldarynan qaza tapqandardyń otbasylary men jaqyndaryna kóńil aıtyp, zardap shekkenderdiń tez saýyǵyp ketýine tilektestik bildirdi.
Osy oqıǵanyń izin ala Mysyr prezıdenti de óz halqyna kóńil aıtyp, sabyrǵa shaqyrdy. Áýelgide bul oqıǵa aýrýhana ishinde ottegi ballony jarylysyndaı kórinip, sál ýaqyt óte jol apatynyń saldarynan bolǵan jarylys dep baǵalanǵanymen, tergep-tekserýler barysynda onyń lańkestik ekeni jáne terrorıstik uıymdardyń qatysy bary anyqtalyp otyr. Jergilikti polısııanyń derekterine qaraǵanda, soqtyǵysqan avtokólikterdiń birine jarylǵysh zattar lyq toltyrylǵan bolyp shyqty. Onyń ústine, atalǵan avtokólik osydan birneshe aı buryn urlanyp, izdeý salynǵan eken.
Jarylys aýrýhana aldynda bolǵandyqtan, emdeý mekemesindegi adamdar qaýipsiz jerge kóshirilgen. Al ǵımarattyń ózi qatty zaqymdanǵan. Tergeý amaldary júrgizilýde.