Taldyqorǵandaǵy B.Rımova atyndaǵy drama teatrynda qurylysshylar kúnine arnalǵan saltanatty jıyn ótti.
Jıynda oblys ákimi Amandyq Batalov sala mamandaryn kásibı merekelerimen quttyqtap, úzdik qurylysshylarǵa marapat tapsyrdy. Oblys ákimi óz sózinde aımaqtaǵy oń kórsetkishterge toqtala kele, óńir qurylysshylarynyń jańadan qurylǵan Raıymbek aýdanyn kórkeıtýge, Arys qalasyn qalpyna keltirý isine óz úlesterin qosyp jatqandaryn da tilge tıek etip, barsha qurylysshylarǵa myqty densaýlyq, tolaǵaı tabys, eńbekte jetistikter tiledi.
Jalpy, oblysta bıylǵy jyly qurylys salasyna 101,3 mlrd teńge bólingen. Bul qarjyǵa 784,5 myń sharshy metr turǵyn úı salý josparlansa, sonyń 364,8 myń sharshy metri birinshi jartyjyldyqta paıdalanýǵa berildi. Al respýblıkalyq jáne jergilikti bıýdjetten qarjylaı qoldaýdyń arqasynda bıylǵy jyly 8 bilim berý mekemesi, 10 densaýlyq saqtaý nysany, 4 dene shynyqtyrý-saýyqtyrý kesheni, ishki ister organdarynyń 18 nysany paıdalanýǵa beriletin bolady. Elbasynyń 5 áleýmettik bastamasynda aıtylǵan stýdent jastardy jataqhanamen qamtý tapsyrmasyna sáıkes oblysta 1930 oryndyq qurylysy josparlanǵan. Sondaı-aq, oblysta ortalyqtandyrylǵan sýmen qamtý deńgeıi bıylǵy jyldyń sońynda 91 prosentke jetkiziledi. Al gazdandyrý jumystary 20 aýdannyń 15-inde júrýde. Sonyń ishinde oblys ortalyǵy Taldyqorǵan qalasyndaǵy jumys 2020 jyly aıaqtalyp, 55 myń abonent kógildir otynǵa qosylady.
Merekelik sharada birqatar memlekettik mekemelerdiń, jaýapkershiligi shekteýli seriktestikterdiń qyzmetkerlerine «Qurmetti qurylysshy» tósbelgisi, QR Indýstrııa jáne ınfraqurylymdyq damý mınıstriniń jáne oblys ákiminiń Qurmet gramotalary jáne alǵys hattary tabystaldy.
Almaty oblysy