Bul týraly Úkimettiń baspasóz qyzmeti habarlady.
QR Úkimetiniń otyrysynda jańa oqý jylynyń bastalýyna daıyndyq týraly QR bilim jáne ǵylym mınıstri A. Aımaǵambetov baıandady.
QR BǴM jergilikti atqarýshy organdarmen birlesip oqýlyqtarmen qamtamasyz etý, bilim berý nysandaryn paıdalanýǵa berý, balalardy tasymaldaýdy uıymdastyrý boıynsha jumystar júrgizip jatyr.
Mektepke deıingi uıymdar jelisi 279 birlikke ulǵaıdy jáne kontıngenti 906,5 myń bala bolatyn 10 593 mekemeni quraıdy. Jekemenshik balabaqshalar úlesi artty - 37,9%, bul ótken jylmen salystyrǵanda 1,6%-ǵa kóp.
Jańa oqý jylynda mektepter 3 mln asa balany qabyldaýdy josparlap otyr. 1 synypqa 405 myńnan asa bala barady, bul ótken jylǵy kórsetkishten 20 myńǵa artyq. Jańa baǵdarlama boıynsha 4, 9, 10 synyptar oqıtyn bolady, kelesi jyly 11 synyp oqıdy. Osylaısha, tolyq kóshý aıaqtalady.
A. Aımaǵambetov atap ótkendeı, oqýlyqtar sapasyn qamtamasyz etý boıynsha jumystar jalǵasyp jatyr. Bıyl «Jeńil portfel» jobasy júzege asyrylady. A.j. 1 qyrkúıekten bastap oqýshylar men ata-analar elektrondy oqýlyqtardy QR Bilim jáne ǵylym mınıstrliginiń saıtynan júktep ala alady. Baspalardan oqýlyqtardyń tıelýine kún saıyn baqylaý júrgiziledi.
«1 qyrkúıekke qaraı barlyq oqýlyqtar árbir mektepke 100% jetkizilýi tıis. Ákimdikter bul máseleni kúndelikti baqylaýǵa alýlary kerek», - dedi A. Aımaǵambetov.
Elimizde 6678 mektepte aǵymdaǵy jóndeý jumystary júrgizildi, 129 mektepte kúrdeli jóndeý jumystary aıaqtaldy, 194 mektepte jóndeý jumystary jalǵasýda.
Qazir respýblıkalyq bıýdjet esebinen 115 mektep salynyp jatyr, onyń ishinde 57-si bıyl paıdalanýǵa beriledi, jergilikti bıýdjet esebinen 79 mektep salynýda.
«Jekemenshik mektepterde jan basyna shaqqandaǵy qarjylandyrýdy engizý boıynsha jumystar bastaldy. Jan basyna shaqqandaǵy qarjylandyrýdy engizgenge deıin 121 jekemenshik mektep bolsa, qazir olardyń sany 146-ǵa jetti. 2019 jyldyń qańtar aıynan respýblıkalyq bıýdjette elimizdegi barlyq jumys istep turǵan jekemenshik mektepterde memlekettik tapsyrys ornalastyrý qarastyrylǵan», — dedi bilim jáne ǵylym mınıstri.
Memlekettik tapsyrys 22 310 oqýshy oryndyq 80 jekemenshik mektepke ornalastyryldy.
A.j. 1 tamyzdaǵy jaǵdaı boıynsha 8 636 oryndyq 25 jekemenshik mektep ashyldy, jyl sońyna deıin 5845 oryndyq taǵy 23 mektep ashylady. 25 637 balany mektepke jetkizý úshin 918 birlik avtokólik paıdalanylady. 2019 jyly 49 jańa avtobýs satyp alyndy.
Elimizde kontıngenti 488,7 myń adam bolatyn 821 kolledj bar. Oqý jylynyń basyna qaraı jataqhanalarda 1085 oryn paıdalanýǵa beriledi.