Jamanqulaq aýylynan soltústik-shyǵysqa qaraı betteseńiz, 10 shaqyrym ótken soń jalpaq jondaǵy Bektemir sopy mazary sonadaıdan kózińizge túser edi. Qoskól shatqalynda ornalasqan mazardyń kirpishi osy óńirdiń ózindik ereksheligine oraı jylqynyń, túıeniń, ýaq maldyń qyly men júnin aralastyra qosyp, ılegen kirpishten qalanǵan eken.
Ýaqyttyń tabyna tótep berip turǵandyǵy da sodan bolýy yqtımal. Áıtpese jalpaq jondaǵy jeldiń óti, Arqanyń aptalap jaýatyn aq jaýyny murtyn qısaıta almaǵan qııapat qasıet qaıdan dersiz.
Kirpishtiń uzyndyǵy 31-32 santımetr, eni 8-10 santımetr shamasynda. Jalpy bıiktigi 5,7 metrdi quraıdy. Keseneniń segiz qyrly pishinin sıpattaıtyn tikburysh qyzyǵýshylyq týǵyzady. Sol zamandaǵy sáýlet óneriniń týyndysy ispetti. Tóbesi de erekshe. Qolshatyrǵa uqsas. Sferalyq-konýstyq kúmbezshelermen jalǵanǵan. Ár qyrynyń dál ortasynda jerden shamamen 1,8 metrge jýyq bıiktikte shaǵyn oıyqtar bar. Segiz qyrly kúmbezdiń ústinde eni keń jabyndysy bar, al ishinde dál osy jerde eni sál tarlaý dáliz ornalasqan.
Bestemir sopy osy tóńirekke din ilimin taratqan. Eski kózderdiń aıtýyna qaraǵanda, el ishin yntymaqqa shaqyryp, jas urpaqty adaldyq pen arlylyqqa tárbıelegen. О́mirden ótken soń sopynyń qara basyn handaı syılaǵan jalpaq jurt jumylyp mazar turǵyzypty. Ishine joǵaryda biz aıtyp ótken oıyqtardan, kúmbezdegi tóbe sańylaýlarynan sebezgilep jaryq túsip turady. Qutty sopyónyń zamandastarynyń kókiregine quıǵan bilim sáýlesi tárizdi.
Japan túzdegi ar men adamgershiliktiń qaraýylyndaı jalǵyz mazardyń janyna tutasyp tal ósipti. Tal butaqtaryna sopyǵa minájat etip kelgen adamdar yrymdap aq shúberek baılap ketedi eken. Táliminen taǵylym alǵan keıingi jurttyń appaq yqylasy ispetti.
Aqmola oblysy,
Egindikól aýdany