«Saryarqa» gaz qubyry jelisiniń qurylysy 2019 jyldyń qazan aıynda aıaqtalady dep kútilýde. Joba tolyǵymen 2020 jyly is júzine asyrylyp, gaz qubyrynyń jelisi tolyq salynyp bitedi.
«Samuryq-Qazyna» ulttyq ál-aýqat qory» aksıonerlik qoǵamy basqarmasynyń tóraǵasy Ahmetjan Esimov «Saryarqa» magıstraldyq gaz qubyry jelisiniń salynyp jatqan 820-shy shaqyrymyna barǵan saparynda osy jáne ózge de máseleler týraly tilge tıek etti.
Gaz qubyry Qazaqstannyń Tuńǵysh Prezıdenti – Elbasy Nursultan Nazarbaevtyń tikeleı tapsyrmasy boıynsha salynyp jatqanyn aıta ketken jón. Kópten beri aıtylyp júrgen gaz jelisi Qazaqstannyń astanasyn, eldiń ortalyq jáne soltústik óńirlerin gazben qamtamasyz etýge arnalǵan.
Jalpy, Ahmetjan Esimov qarqyndy júrgizilip jatqan qurylys obektisine oń baǵa berdi. Degenmen, qurylys ornynda áli de pysyqtaıtyn sharýalar bar. Esimov jaýapty tulǵalarǵa qurylysty belgilengen ýaqytta aıaqtap, sondaı-aq iske qosý-jóndeý jumystarynyń óz merziminde júzege asyrylýyn qamtamasyz etý qajettigin atap kórsetti.
«Qazirgi tańda gaz qubyry qurylysynyń 75 paıyzy aıaqtalǵan. Qubyrlardy jalǵaý jumystary Qaraǵandy men Aqmola oblystarynda júrgizilýde. «QazMunaıGaz» UK» AQ ákimdiktermen birlese otyryp, qurylystyń jelilik jaǵy támamdalǵannan keıin eldi mekender men astanany gazben jabdyqtaýǵa kirisedi», deıdi Saǵıdolla Maqashev.
Aıta keteıik, «Samuryq-Qazyna» qory osy iri jobany qarjylandyrýǵa qatysyp otyr, negizgi merdiger – «QazQurylysServıs» kompanııasy, operatory – «Astana Gaz QMG» kompanııasy. «Saryarqa» gaz qubyry «Beıneý – Bozoı – Shymkent» magıstralynyń gaz qubyrynan bastalady. Gaz qubyrynyń uzyndyǵy 1061 shaqyrym jáne bul 1,7 mln turǵyny bar 171 eldi mekendi qamtymaq.