Keshe elordadaǵy Ulttyq akademııalyq kitaphanada óleńsúıer oqyrman úshin tamasha tartý – «Qazaq poezııasynyń injý-marjandary» antologııasynyń tusaýkeser rásimi ótti. Joba Elbasy Nursultan Nazarbaevtyń «Rýhanı jańǵyrý» baǵdarlamasy aıasynda Memleket basshysy Qasym-Jomart Toqaevtyń tikeleı qoldaýymen júzege asyrylyp otyr.
Kóptomdyq tańdamalyǵa Abaı, Shákárim, Maǵjan, Ilııas Jansúgirov, Qasym Amanjolov, Juban Moldaǵalıev, Jumeken Nájimedenov, Tumanbaı Moldaǵalıev, Qadyr Myrza-Áli, Muqaǵalı Maqataev, Farıza Ońǵarsynova, Oljas Súleımenov, Muhtar Shahanov syndy barlyǵy 13 aqynnyń óleńderi engizildi. Jobanyń shyǵarmashylyq jetekshisi, jazýshy Álibek Asqarovtyń aıtýynsha, antologııaǵa engen aqyndardyń tizimin Prezıdent Qasym-Jomart Toqaev bekitip beripti.
– Osydan bir jarym aı buryn Prezıdenttiń tikeleı bastamasymen Memlekettik hatshy Marat Tájın aıtýly jobany júzege asyrý jóninde tapsyrma berdi. Sodan arnaıy tizim daıyndap, usyndyq. Tizimdi Memleket basshysy Qasym-Jomart Toqaevtyń ózi qarap shyqty. Ishinen joǵaryda aty atalǵan 13 aqyn tańdap alyndy. Ýaqyt óte tyǵyz bolǵandyqtan, baspa izdep alysqa barmadyq. Jınaq elordadaǵy «Folıant» baspasynan basylyp shyqty», – dedi kitap tusaýkeserinde jazýshy Álibek Asqarov.
Joba jetekshisi atap ótkendeı, Memleket basshysynyń ár aqynnyń shyǵarmashylyǵyna asa yjdahattylyqpen qarap, jınaqqa engen ár týyndyǵa úlken jaýapkershilik hám janashyrlyq tanytqanyn kitaptyń alǵysózinde jazylǵan myna pikiri aıqyn dáleldeıdi:
«Álbette qazaq ádebıeti daryndy aqyndarǵa kende emes. Qazaq óleńinde tebirenis te, tolǵanys ta, namys ta, tereń tanym da bar. Mártebeli oqyrman ár aqynnan óz talǵamyna saı óleń izdeıdi. Sondyqtan da aldaǵy ýaqytta osy toptama jalǵasyn taýyp, kórnekti aqyndarymyzdyń shyǵarmalaryn jaryqqa shyǵara beremiz degen senimdemin. Qazaqtyń jyr kerýeni, rýhanı dúnıemiz jańǵyrtyp, bolashaǵymyzǵa baıandy baǵdar kórsete bersin» dep jazady Qasym-Jomart Toqaev antologııanyń alǵysózinde.
Memlekettik hatshy Marat Tájınniń basshylyǵymen júzege asyrylǵan osy eńbektiń tusaýkeser rásimine Qazaqstan Jazýshylar odaǵynyń tóraǵasy Ulyqbek Esdáýlet, Senat depýtaty Nurtóre Júsip, jazýshy-ǵalymdar – Ánes Saraı, Muhtar Shahanov, Murat Áýezov, Baıanǵalı Álimjanov, Namazaly Omashev, Sherýbaı Qurmanbaıuly, Serikzat Dúısenǵazın bastaǵan qalamgerler qatysyp, jınaq jaıly óz pikir-lebizderin ortaǵa saldy. Quttyqtaýlaryn jetkizdi. Usynystaryn aıtty. Máselen, Almatydan arnaıy kelgen qonaq, mádenıettanýshy-ǵalym Murat Áýezov antologııanyń aıasyn keńeıtip, Abaıdan keıingi ǵana emes, Abaıǵa deıingi aqyn, jyraýlardyń shyǵarmashylyǵyn da aldaǵy ýaqytta qamtý qajettiligin aıtsa, belgili aqyn, manasshy Baıanǵalı Álimjanov poezııa týraly telebaǵdarlamalardy kóbeıtý arqyly jastarymyzdy poezııany túsiný men óleń oqý mádenıetine tárbıeleý isi búgingi tańda kezeń kúttirmeıtin másele ekenin alǵa tartty. Tusaýkeser rásimin Senat depýtaty Nurtóre Júsip túıindedi:
– «Bir adam ot jaqsa, júz adam jylynady» deıdi. Qolymyzdaǵy myna tamasha kitapqa toptastyrylǵan 13 aqynnyń jyry arqyly mıllıondardyń jany da, júregi de jylynady ǵoı dep oılaımyn. Sondyqtan bul izgi bastama baıandy, uzaǵynan bolǵaı, – dedi.
Joba uıymdastyrýshylary atap ótkendeı, «Qazaq poezııasynyń injý-marjandary» antologııasy bul 13 tommen shektelmeıdi. Keleshekte taǵy da tyń bastamalarǵa negiz bolady, tizim tolyǵa túsedi. Al búgingi tusaýy kesilip, oqyrmanyn qýantqan qazyna qyrkúıek aıynyń 4-6-sy aralyǵynda elorda tórinde tuńǵysh ret ótkeli otyrǵan «Azııa qalamgerleriniń I forýmyna» qatysýshy qonaqtarǵa tamasha tartý bolady dep kútilýde.