Elordada Qazaqstan men Qytaı arasyndaǵy saýda-ekonomıkalyq baılanysty nyǵaıtý maqsatynda qytaılyq ınvestorlardyń forýmy ótti. Kórshiles eldiń isker azamattary «Astana» halyqaralyq qarjy ortalyǵynyń jumysyn joǵary baǵalap, birlesken jobalardy iske asyrýǵa nıetterin bildirdi.
Qytaı delegasııasyn dúnıejúzilik «Bir beldeý, bir jol» uıymy tóraǵasynyń orynbasary jáne Halyqaralyq ınvestısııalyq qorlardy basqarý uıymynyń prezıdenti Van Sıaodýn bastap keldi. Ol «Bir beldeý, bir jol» bastamasy Qazaqstan men Qytaıdyń arasyndaǵy yntymaqtastyqqa oń yqpal etip, ıntegrasııalyq úderisterge qarqyn beretinin aıtty.
– Qazaqstan Eýrazııa keńistiginiń dál ortasynda ornalasqany belgili. «Astana» halyqaralyq qarjy ortalyǵy – brıtandyq quqyq negizinde jumys isteıtin biregeı avtonomdy alań. Munda tirkelgen qarjy uıymdaryna barlyq jaǵdaı qarastyrylǵan. Qolaıly sıfrly ortadan bastap, tıimdi jeńildikterge deıin bar. Bıyl eki memlekettiń dıplomatııalyq qarym-qatynasynyń ornaǵanyna 27 jyl tolyp otyr. Sondaı-aq QHR tóraǵasy Sı Szınpınniń Nazarbaev Ýnıversıtette «Bir beldeý, bir jol» strategııalyq ıdeıasyn saltanatty túrde jarııalaǵanyna da 6 jyl boldy. Eki el arasyndaǵy dıplomatııalyq baılanystyń ornaǵan kúninen bastap, ózara yntymaqtastyq san salany qarqyndy qamtyp keledi. Keleshekte mádenıet, densaýlyq saqtaý, týrızm, ekonomıka, sıfrly tehnologııalar jáne bıotehnologııa baǵytynda áriptestikti nyǵaıta túsýdi josparlap otyrmyz. Qazaqstan Qytaıdy Batys Eýropamen jalǵaǵan kópir ispettes, – dedi V.Sıaodýn.
Budan bólek, qytaılyq qarjygerler bank qyzmeti boıynsha birlesip jumys isteýge ázir. Atap aıtqanda elimizde Azııa-Tynyq muhıty valıýtalyq-ınvestısııalyq banki men Dúnıejúzilik birlesken banktiń bólimsheleri ashylýy múmkin. Búginde qos tarap tıisti ýaǵdalastyqqa qol jetkizýge jaqyn. Atalǵan qarjy ınstıtýttary birinshi kezekte otandyq korporatıvtik sektorǵa qyzmet kórsetýdi qolǵa almaq.
– Qazaqstandyq áriptesterimizben kelissózder júrgizilip jatyr. Bári sátti ótse, bank fılıaldary Nur-Sultanda ashylýy múmkin. Bizdiń bank isker ortamen jumys isteýge múddeli. Áıtse de turǵyndarǵa da qyzmet kórsetýdi oılastyramyz, – dedi Azııa-Tynyq muhıty valıýtalyq-ınvestısııalyq bankiniń jáne Dúnıejúzilik birlesken banktiń tóraǵasy Fen Sıanshan.
Forým barysynda eki tarap týrızm salasynda birlesken jobalardy iske asyrýǵa ýaǵdalasty.