Qaraǵandy oblysynyń barlyq qalalary men aýdandarynda Konstıtýsııa kúni merekesinde kóptegen is-sharalar uıymdastyrý josparlanǵan. Qazirgi ýaqytta óńirdegi qalalar men eldi mekenderdiń kósheleri qyzyldy-jasyldy jalaýshalarmen, Ata zańnyń mán-maǵynasyn arqaý etken bannerlermen jáne shaǵyn sáýlet pishinderimen bezendirilip, merekelik keıipke enip keledi.
Mereke kúni kenshiler astanasyndaǵy ortalyq saıabaqta qala turǵyndary men qonaqtary teatrlandyrylǵan qoıylymdardy tamashalaıtyn bolady. Budan keıin ol jerde konsert bolyp, vokaldyq jáne horeografııalyq ansamblder el aldynda óner kórsetedi.
Al keshke qaraı Qaraǵandy qalasynyń negizi qalanǵannan bastap búgingi kúnge deıingi tarıhy teatrlandyrylǵan qoıylym túrinde kórermen qaýymǵa usynylmaqshy. Sonymen qatar, bul keshte qaraǵandylyqtar aldynda qazaq estradasynyń juldyzdary Aıjan Nurmaǵambetova men Bolat Qusaıynov óner kórsetedi. Belgili qoǵam qaıratkerleri de án shyrqap, tyńdarman qaýymǵa tosynsyı jasamaqshy. Al merekelik keshtiń sán-saltanatyn otshashýlar túıindeıdi.
Buǵan qosa, mereke qarsańynda Qaraǵandy oblysynyń barlyq qalalary men aýdandarynda saltanatty jıyndar ótedi. Bul kúni eren eńbegimen, úlgi isterimen, tamasha jetistikterimen kózge túsip, nazarǵa ilikken ozattarǵa jergilikti ákimdikter tarapynan syı-qurmet kórsetilmekshi.
Qaraǵandy oblysy