Qostanaıda «Aımaqtyq jáne jahandyq qaýip-qaterler turǵysynan Orta Azııada adam saýdasyna qarsy kúresti kúsheıtý men osal mıgranttardy qorǵaý» óńirlik jobasy ashyldy. Ony Norvegııa koroldigi Syrtqy ister mınıstrliginiń qoldaýymen Halyqaralyq kóshi-qoń uıymy (HKU) – BUU agenttigi júzege asyryp otyr. Bul jóninde oblystyq polısııa departamentinde «Damytý» qoǵamdyq qorynyń adam saýdasy máseleleri jónindegi vedomstvoaralyq komıssııa jumysynyń jospary sheńberinde ótkizgen brıfınginde keńinen áńgime boldy.
Brıfıngte Halyqaralyq kóshi-qoń uıymy (HKU) – BUU agenttigi jobasynyń úılestirýshisi Anısa Qýanova jobanyń mán-mańyzy, Qazaqstanǵa kelgen mıgranttardyń quqyǵy men mindetteri týraly aıtyp berdi. Qazaqstanǵa kelgen mıgranttardyń qıyn jaǵdaıǵa ushyraýy adamdardyń qujattaryn joǵaltyp alýyna, jumys berýshilerdiń eńbek aqysyn tólemeýine, eńbek kelisimin jasamaýyna jáne adamdardyń quqyǵyn aıaqqa basýyna baılansty bolady. Osy oraıda quqyqtyq, eńbek qatynastardy retteýdi atalǵan halyqaralyq uıym jergilikti Polısııa departamenti jáne Jumyspen qamtý jáne áleýmettik baǵdarlamalardy úılestirý sekildi memlekettik organdarmen birlesip sheshedi.
Qostanaı oblysyndaǵy kóshi-qoń qozǵalysynyń kúsheıýi oblystyń etnıkalyq kartasynyń ózgerýimen, adamdardyń TMD elderine kóshýi sekildi úderistermen jáne ishki kóshi-qońnyń toqtamaýymen de tyǵyz baılanysty. Adam saýdasyna baılanysty qylmystarǵa da osy kóshi-qoń negizgi sebep bolady eken. Mysaly, «Damytý» qoǵamdyq qorynyń tóraıymy Nına Kosıýk qazir adam saýdasynyń qurbanynyń ólimine qatysty qylmystyq is sotta qaralyp jatqanyn aıtty.
«Er kisi Meńdiǵara aýdanynda quldyqta bolǵan. Ony baılap ustaǵan, onyń qazannan kir qolymen tamaq alyp jeýi óligine sebep bolǵan. Al shıedeı ash bolǵan. 2016 jyly ólgen, al qylmys bıyl ǵana ashylyp otyr» deıdi Nına Kosıýk. Jalpy osy qordyń panalatatyn ornynda adam saýdasynyń qurbany bolǵan eki adamnyń taǵdyry ólimmen aıaqtalǵan.
Qostanaı oblysynda adam saýdasynyń qurbanyna aınalatyndar az emes. Olardyń basym kópshiligi shetel azamattary. Mysaly, 2017 jyly oblys óńirinde 40 adam qıyn jaǵdaıǵa ushyrasa, sonyń 20-sy О́zbekstan azamattary bolatyn. О́tken jyly Qazaqstan arqyly ótken 13 sheteldik quldyqqa salynsa, bıyl 4 adamnyń taǵdyry saýdaǵa salynǵan.
Qostanaı