Premer-Mınıstr Asqar Mamınniń tóraǵalyǵymen ótken QR Úkimetiniń otyrysynda Bilim jáne ǵylym mınıstri A. Aımaǵambetov tanystyrǵan «Pedagog mártebesi týraly» zań jobasy maquldandy. Almaty oblysynyń ákimi A. Batalov pen Nur-Sultan q. ákimi A. Kólginov zań jobasynyń erejelerin pedagogıkalyq qoǵamdastyq ókilderimen talqylaý týraly baıandady. Sondaı-aq Úkimet otyrysynda josparlanǵan jańalyqtardy talqylaýǵa shaqyrylǵan Aqmola oblysy Nıkolsk orta mektebiniń pedagogy N. Quttybaeva sóz sóıledi. Bul týraly primeminister.kz habarlady.
«Pedagog mártebesi týraly» zań jobasy QR Tuńǵysh Prezıdenti – Elbasy N. Á. Nazarbaevtyń bastamasy boıynsha ázirlengen», — dedi Asqar Mamın.
Ázirlengen zań jobasy Memleket basshysy Q. K. Toqaevtyń orta bilim berý júıesin damytý jáne bilim sapasyn arttyrý jónindegi alǵa qoıǵan mindetterine jaýap beredi.
Zań jobasyn ázirleýdiń negizgi ıdeıasy — muǵalimderdiń júktemesin azaıtý, olardy ózderine tán emes jumystardy oryndaýdan bosatý arqyly ózin-ózi damytýǵa jáne shyǵarmashylyqqa múmkindik berý.
Buǵan qosa, muǵalimderdiń jalaqysyn arttyrýǵa, eńbek demalysyn ulǵaıtýǵa, pedagogtik sheberlik, tálimgerlik úshin qosymsha aqy tóleýge baǵyttalǵan sharalar kózdelýde. Aıta ketý kerek, bul zań jobasy óńirlerdiń ákimderine bıýdjet múmkindigine qaraı muǵalimderge materıaldyq kómek kórsetý máselesin ózdiginen sheshýge múmkindik beredi.
«Muǵalimderdiń kásibı turǵydan damýyna jáne básekege qabilettiligin arttyrýǵa jaǵdaı jasaý josparlanǵan, — dedi Asqar Mamın. — Pedagog mártebesin arttyrý, olardy yntalandyrý mindeti de kózdeledi».
Úkimet basshysynyń aıtýynsha, jalpy zań jobasyn iske asyrý muǵalim mamandyǵynyń mártebesin arttyrýǵa, olardyń ar-namysy men qadir-qasıetin qorǵaýǵa, pedagogtar úshin áleýmettik kepildikter júıesin jasaýǵa jol ashady.
Máseleni qaraý qorytyndysy boıynsha, QR Premer-Mınıstri Asqar Mamın osy jyldyń 1 qyrkúıegine qaraı Parlament Májilisine «Pedagog mártebesi týraly» jáne «Pedagog mártebesi, oqýshy men muǵalim júktemesin tómendetý máseleleri jónindegi keıbir zańnamalyq aktilerge ózgerister men tolyqtyrýlar engizý týraly» zań jobalaryn engizýdi qamtamasyz etýdi tapsyrdy.